AFC Cup final History ziak danglam turin Bengaluru
India club zinga a hmasa ber ni turin Bengaluru FC-in Asia khawmualpuia club inelna sang ber dawttu AFC Cup final an lut a, zanin dar 10:00 hian Doha khawpuiah Iraqi Premier League champion Air Force Club nen nomawi an inchuh dawn. Bengaluru tan Indian football chanchin ziah danglamna remchang a ni a, inkhel hi Star Sports 1 leh Star Sports HD1-ah live-in a en theih ang.
Player langsar
Bengaluru FC tan ṭum dang ang bawkin Sunil Chhetri chu innghahna a ni leh dawn. Kum 32-a upa striker hian semifinal-a Johor Darl Ta’zim an hneh ṭumin goal ropui pahnih a khung a, Iraqi club tlarhnung chhaih buai turin a ṭha tawk. South Indian club tan midfield-ah Eugeneson Lyngdoh a pawimawh leh dawn a, tlarhma lama Khasi tlangval duhthala a tal theihna tura defensive midfielder ṭangkai Cameron Watson hming lam hmaih theih a ni lo bawk.
Iraqi club tana player ṭngkai tur chu Hammadi Ahmad a ni. Kum 27-a upa striker hian match 11 a khelh tawhah goal 15 khungin AFC Cup top scorer a ni mek a, Bengaluru tlarhnungin John Johnson hoin hna an ngah sawt dawn tihna a ni. Air Force Club-in chanchin lawmawm lo an nei a, an player pawimawh pahnih centre-back Samal Saaed leh midfielder Bashar Rasan te chu hliam vangin an inlan thei dawn lo.
India tan
Bengaluru captain Sunil Chhetri chuan, "Zanin kan inkhel tur hi Bengaluru tan a ni satliah lo a, India-in Asia football-a harhtharna a channa kawnga hun pawimawh bik a ni. Vawiina kan sulhnu hian India club dang a ben harh ka beisei. Zaninah minute 90 kan khel dawn a, team ṭha zawkin hnehna an chang ang," tiin a inringtawk hle.
Ashley Westwood-a hmunruak luaha Bengaluru enkawltu Albert Roca chuan, "Tunah hian kan hna kan la thawk zo lo. Final kan luh avangin Indian football chanchin chu kan ziak danglam ngei a, mahse hei aia ropui zawka ziah danglam hi ka la duh cheu a ni," tiin AFC Cup nomawi chawi a duh thu a sawi.
Thuama a inpeih
Bengaluru FC first chocie keeper Amrinder Singh-a'n AFC Cup semifinal second leg-a Johor Darul Ta’zim an hneh ṭumin inelnaa a yellow card pahnihna a hmu a, Punjabi keeper hian final-ah goal a veng thei dawn lo - Mizo kee-per Lalthuammawi Ralte tan vanneihna a ni. Champhai tlangval hian zaninah Bangalore club tan si ban a nghak ang.
Kum 2011-a Shillong Lajong tana a professional match hmasa ber kheltu keeper chuan, "Zanin kan inkhel tur hi ka career-ah chuan match pawimawh ber a ni. Indian club zinga AFC Cup final lut hmasa ber kan nih avangin a pawimawh lehzual a, Pathian thu thu ni mah se chak ngei tumin a hma zawng aia nasain kan inbuatsaih a ni," tiin Vanglaini palai hnenah a sawi.
Thuama hi 2014-15 season-ah Bengaluru tan player pawi-mawh ni mah se Amrinder Singh-a'n tun season-ah a nek chhuak. Champhai tlangval Thuama chuan, "A hun takah Pathianin rem min ruat sakah ka ngai a, ka hun ṭha neih hi khawhral mai mai ka tum lo. Keimah lamah pawh nasa takin ka inbuatsaih a, Mizo mipuite ṭawngṭaipuina ka mamawh takzet a ni," tiin ṭawngṭainaa hre reng turin Mizo mipui a ngen.