BVT a chung berah an awm zel Sawmfela'n Chanmari a chhan

Nimin tlai khan Mizoram Premier League hmahruaitu nih inchuhna inkhelhah Bethlehem Vengthlangin Lal-nunmawia hmangin goal khung hmasa mah se Chanmari FC-in hun tawp hma hretin Malsawmfela hmangin an sut.

Lalbiaksanga Colney hoten point 20 hmuin hmahruaitu an ni chhun-zawm zel a, Chanmari FC-in point 19 hmuin pahnihna an ni ve zel bawk.

Goal khungtu unau

Bethlehem Vengthlang FC-in phase 1 bikah Lam-mualah hneh loh an tawng lo a, amaherawhchu player inhliam leh squad tlem vangin Chhangphut Field-ah an mualpho. Chanmari FC-in Champhaiah BVT hi 4-1 zetin an sawp a, BS-a hote hi hmahruaitu ni zel mah se an rilru hliamin a awm a, phuba lak ngei an tum.

BS-a'n Champhaia zin lo player pasarih ngawt a neih belh a. Player thar zinga pakhat chu Chanmari tan pawha lo khel tawh Mawitea a ni a, Ramhlun South tlangval hian minute 34-naah ding lam aṭanga Lalrintluanga cross a tauh lut. BVT-in Mawitea goal chakpui tum mah se Chanmari FC-in Mawitea u Sawmfela an kawl miau avangin an beisei angin a kal lo, minute 90-naah Sawmfela'n box chhungah striker ṭha bik a ni tih lantirin an siphurh a sut.

A hmuhnawm

BVT leh Chanmar- te hi chhiar-kawp dan ang thlapin semi-final la lut lo mah se an intum leh a nih chuan a hmuhnawm khawp ang. Nimin inkhelah chance ṭhahnem tak a awm a, supporter an neih ṭhat avangin khelmual pawna mipui au hla pawh ngaihnawm tham a ni.

BVT ṭantuten "Sir Sanga kan nêk sawr pawr e," tiin an zai rual a, BVT aṭanga qa chhuah ruala player ṭhahnem tak chhuahpuitu coach an dem - Chanmari mipuiin an coach chhanna au hla an nei lo thung a, sawmfela goal thun hnuah erawh an va auel lêt.

Engtin zel?

Chanmari FC coach Lalsang-zuala Hmar chuan, "Nimin chauha rawn thleng alawm, engtin nge bul a ṭantir ang. Kan khelh dan a hriat chian hunah chauh inkhel bul a ṭan ang," tiin hun tawpa dawna a luhtir Nigerian defender Ugochukwu Godswill chungchang a sawi a, semi final an la luh chian loh thu a sawi bawk.

Bethlehem VT coach BS-a chuan, "Kan khel ṭha khawp mai, ka player-te an khelh danah ka chhuang a. Hun tawpa goal kan chhuah avangin kan vanduai a ni," a ti.