Djokovic leh Murray inum zel

Novak Djokovic leh Andy Murray te chu season tawpa world number 1 nih tumin an inum chho zel. Ningani zan khan player langsar pahnih hian an khingpui ve ve hnehin Paris Masters quarterfinal an lut.

World number 1 Djokovic-a'n set hmasa ber a hloh zet hnuah Grigor Dimitrov chu 4-6, 6-2, 6-3 in a hneh a, quarterfinal-ah Wimbledon finalist Milos Raonic a hma-chhawn leh ang. World number 2 Murray pawhin 6-3, 6-0 in Lucas Pouille a sawp a - ani hian seeded pasarihna Tomas Berdych a hmachhawn leh bawk ang.

Britain tlangval Murray hian Paris Masters nomawi a chawi thei a nih a, a elpui Djokovic-a'n final a lut lo a nih chuan a vawi khat nan ATP ranking-ah number 1 a ni thei dawn a ni.

Inkhel dangah Marin Cilic chuan David Goffin hnehin ATP World Tour Finals khel turin a tling chiang ta bawk a, ani bakah hian Djokovic, Murray, Stan Wawrinka, Raonic, Kei Nishikori leh Gael Monfils te chu O2 Arena-a inlan thei turin an lo tling chiang tawh bawk.