North London derby Gunners vs Spurs
Premier League inkhel ngaihven hlawh berte zinga mi North London derby chu tun season-a a vawi khat nan Pathianni tlai 5:30 hian khelh a ni dawn. Emirates Stadium-ah Arsenal chuan an elpui leh hmelma kumhlun Tottenham Hotspur an lo mikhual ang.
North London derby hmasa ber chu 19 November, 1887 khan khelh niin, league match bikah chuan 4 December, 1909 kha a ni thung - hemi ṭum hian Arsenal 1-0 in an chak; an intawn hnuhnung ber chu 5 March, 2016 kha niin hemi ṭum hian 2-2 in an inhnehtawk.
Inelna hrang hrangah club pahnihte hi vawi 183 an inhma-chhawn tawh a, an sulhnu thlir chuan Arsenal chungnung zawkin vawi 78 hnehna an chang a, vawi 50 inhnehtawkin ṭum 55 dangah Spurs an chungnung zawk ve thung. Club inel leh inhal em em an nih avangin player pawh an inlei sak tawn tam lo a, player pariat chiah Gunners leh Spurs tana khel kawp thei hi an la awm - an zingah hian Jimmy Robertson leh Emmanuel Adebayor te chiah club pahnih tana goal khung kawp thei an la ni.
Wenger a zam lo
Kum 67-a upa Wenger chuan, "League-ah dinhmun pawimawh takah kan awm mek a, anni pawh chutiang tho chu an ni. Kum dang ang thoin inkhel pawimawh bik a ni leh dawn chiang a, kan khelmuala inkhel tur kan nih avangin hnehna kan chan ka beisei," tiin a sawi.
French manager hian Arsenal a enkawl hnuah Tottenham hi vawi 48 a hmachhawn tawh a, a nauten goal 91 zet khung tawhin club dang zawng zawng aiin Spurs lakah hian goal an khung hnem.
Arsenal tan Olivier Giroud leh Aaron Ramsey an dam chiang tawh a, training-na lama hliam tuar Hector Bellerin-a'n Champions League khel lo mah se Spurs hi hmachhawn thei tura beisei a ni. Ningani khan Theo Walcott-a'n training a zawm leh tawh a, Nacho Monreal, Santi Cazorla leh Kieran Gibbs te dinhmun a chiang lo thung.
Gunners hian season ṭan nia Liverpool an hneh loh hnuah hneh loh an la tawng leh lo a, an match hnuhnung 10-ah phei chuan vawi kua an chak - Wenger-a sawi angin inrintawkna sang tak nen Spurs an lo mikhual ang.
Spurs fiahna?
Premier League match 10 khelh tawh aṭanga hneh loh la tawng lo awmchhun chu Tottenhman hi an ni. Mahse, Mauricio Pochettino naute hian an khingpui vawi nga an draw tawh avangin league table-ah pangana an ni. Spurs hian Nilaini zan khan Champions League group match-ah Bayer Leverkusen 1-0 in an hneh lo a, keeper leh captain ni bawk Hugo Lloris chuan Arsenal laka point hmu tur chuan insiam-
ṭhat nghal an ngaih thu a sawi.
Spurs hian inelna hrang hrangah a zawnin match ruk chhung chu chak ni hmel an hmu tawh lo a, heng zinga match ngaah phei chuan penalty
aṭanga goal hnih an khung bak an khingpui goal-ah an pet lut miah lo.
Striker rinrawl Harry Kane chu September 18-a Sunderland nen an inhmachhawn ṭuma a hliam hnuah a la inkhel leh lo a, season hmasa league top scorer Kane (25 goals) awm loh hlanin goal khung an harsat hle. England international hian team training zawm tawh mah se Gunners hi a hmachhawn a nih pawhin a ṭhat lai ber ang kha chu a ni rih lo ang.
Tottenham captain Lloris chuan, "Leverkusen laka kan khelh dan kha Spurs khelh dan tur a ni lo, khelmual chhungah tihtakzetna kan lantir tur a ni. Beisei ang result kan neih loh rei tak avangin Arsenal lakah hian point hmuh kan duh anih chuan a bul aṭanga a tawp thlenga kan beih a ṭul ang," tiin a sawi.