Turkey-ah Jose leh United an tlawm

Jose Mourinho kaihhruai Manchester United chu Fenerbahce khelmualah 2-1 in an tlawm a, Premier League champion hnem ber club hian Champions League an khelh phak loh hnuah Europa League group stage paltlang zo lo thei dinhmunah an ding mek.

Man United hian match li khelh tawh aṭangin point ruk an hmu a, an chungah hian point sarih nei tawh Feyenoord leh Fenerbahce te awmin Group A-ah pathumna an ni mek. Premier League club dang Southampton chuan Inter Milan lakah 2-1 a hnehna changin knockout stage lut turin an dinhmun an sawh nghet thung.

A goal nghal

Mikhual tana inkhelh chak-awm lohna hmun Sukru Saracoglu Stadium-ah inkhel ṭan aṭanga second 65-na lekah Moussa Sow chuan goal hmahruai a khung nghal. Fenerbahce striker hian Hasan Ali Kaldirim-a cross chu vawi lehkhatah bin thutin United keeper David de Gea tan tih theih a awm lo.

Turkish club hian Jeremain Lens hmangin second half-ah an goal hnihna an khung leh a, khawvela player manto ber Paul Pogba a inhliam tawh bawk a vangin United an buai takzet. Hun tawp hma chiahin captain Wayne Rooney chuan goal khat khung ve mah se an sipurh sut zo turin Mourinho nauten hun ṭha an nei tawh lo a, kut bengin an haw a ṭul.

United an buai?

United midfielder Pogba chu Brazilian midfielder Souza nen ball an inchuhnaah a malpui a tih nat avangin lakchhuah a ngai. Pathianni zan dar 8:30-a Swansea City an lenchilh hunah Pogba hi a inlan theih dawn leh dawn loh a la chiang lo. Kartawp Premier League-a Burnley nen an inkhelh ṭuma hnawhchhuah Ander Herrera chu hrem a nih bawk avangin Mourinho tan midfield remkhawm thiam a ṭul dawn.

United hian khup na vangin Eric Bailly bakah Antonio Valencia leh Chris Smalling te chu hliam vangin an chhawr thei lo mek a, tlarhnungah duhthlan tur an nei chauh rih hle.

Portuguese manager Mou-rin-ho chuan inkhel chungchang sawiin, "Anni lam khan Champions League final angin an khel a, keini lam ve thung chuan nipui laia friendly match kan khelh ang chauhin kan khel - chu chu a danglamna a ni. Minute hnih pawh tling loah goal kan chhuah a nih chuan kan inring hman lo tihna a nih bakah inkhelah kan rilru kan pe tawk lo a, kan rilru a inpeih lo tihna a ni bawk," tiin a sawi.

United hian inelna hrang hranga an match hnuhnung paliah goal hnih chiah an khung a, Premier League-ah Chelsea an hneh loh ṭumin second 30-na lekah Pedro an ven hneh loh vangin goal an chhuah a, tunah second 65-na lekah Moussa Sow an veng hneh lo leh bawk.

Chelsea manager hlui chuan sawi chhunzawmin, "Fenerbahce khan chak an phu zawk. Football-ah chuan theihna sang tak neih aiin inpumpekna leh tihtakzetna a pawimawh zawk. Hnehna chang tur chuan minute 90 chhung i theihna zawng zawngin i khel tur a ni," tiin a naute chu inkhelah an rilru zawng zawng an pe tawk loah a ngai.

Saints an chak

Inter Milan tan Mauro Icardi chuan first half-a goal awmchhun khung mah se mualneitu Southampton lamin inkhel chawhnu lamah Virgil van Dijk hmangin an siphurh sutin Inter defender Yuto Nagatomo-a own goal hmangin hnehna an chang zui.

Saints hian match li an khelh aṭanga point sarih hmuin point kua hmutu Sparta Prague chiah tluk loh an nei, hetihlai hian Inter erawhin point thum chiah an la neih avangin Group K-ah a hniam ber an ni thung.

Southampton manager Claude Puel chuan, "Ka player-te thawhrim rah a ni a, chutihrualin min ṭan tura rawn pungkhawm fan-te hnathawh kha hmuh hmaih theih a ni lo. Anni kha inkhelh chhung zawngin kan tan an ṭangkai a ni. Kan tan hnehna chan hi a pawimawh a, chutihrualin kan hna a la zo lo a, last 32 lut turin hmabak kan la nei tih kan hriat a ṭul," tiin a sawi.

Southampton hian Premier League match 10 khelh tawh aṭangin point 13 an hmu tawh a, Pathianni zan dar 7:45 hian Hull City khelmualah an lenglut ang.

Ngaihnawm

• Wayne Rooney-a'n Man-chester United tan European competition bikah goal 38 khungin Ruud van Nistelrooy record lo siam tawh a tluk chiah.

• Inelna hrang hranga United tana Bobby Charlton-a record lo siam tawh goal 249 tluk turin Rooney-a'n goal hnih bak a mamawh tawh lo.

• Red Devils hian European competition-ah khualmuala an zinchhuah hnuhnung match kuaah hnehna an chang zo lo vek, vawi khat inhnehtawkin ṭum riat ngawt an chak lo.

• Fenerbahce hian an khel-muala European match an khelh hnuhnung pariatah chak loh an nei lo.