Transfer chungchangah Infantino a ṭawng chhuak

FIFA president Gianni Infantino chuan player transfer dan chuan uluk zawka zirchian leh ennawn a mamawh nia a hriat thu sawiin transfer che vel chu lang tlang zawk leh chiang zawk ni se a duh thu a sawi.

Infantino chuan club ten an hmalam hun thlirlawka player naupang tak tak an lalut chu ṭha lo a tih thu a sawi a, club squad pumpuia player awm thei zat bituk thlenga a ngaihtuahnaa a awm thu a sawi. Infantino chuan, "Transfer-ah hian thil mak tak tak a thleng fo a, zirchian a mamawh a ni. Transfer bazar-ah dollar tluklehdingawn chuang sum a chevel a, heng sum te hi thianghlim leh dik taka hman an nih leh nih loh hriat a ngai a ni," a ti.

FIFA president chuan sawi chhun-zawmin, "Tuna kan transfer kal-phung hi kum 2000-2001 inkara kan hman tawh kha a ni a, kum 15 liam hnuah chuan ennawn a ṭul tawh a ni. Club ṭhenkhatin player naupang tak an lalut a, loan-in a chhuahtir leh a, a tawpah an hralh leh a, a kalphung hi player leh club tan pawh a ṭha lo," tiin transfer kalphung chu thlak danglam ngei a tum hmel hle.