Shanghai SIPG-ah AVB a lut

Chelsea leh Tottenham manager hlui Andre Villas-Boas chuan Chinese Super League club Shanghai SIPG a zawm. Chinese club lian hian England boss hlui Sven-Goran Eriksson chu beisei a phak loh avangin an ban a, Swede coach aiawh tur hian AVB hi an lalut ta a ni. Eriksson hian Chinese Super League season neih zawh takah khan Shanghai hi pathumna bak a nihpui thei lo.

Shanghai SIPG chuan, "Andre Villas-Boas hi Europe-a manager beiseiawm ber pawl, tawnhriat ngah ber zinga mi leh he game tupui em em tu a nih avangin kan lalut a ni," tiin Portuguese manager chu an ṭhatpui ngei an beisei thu an sawi.

Kum 39-a upa manager hian nipui laia Zenit Saint Petersburg a chhuahsan hnuah club a la nei leh lo a, Russian club-a season hnih hun a hman chhungin league nomawi bakah Russian Cup leh Super Cup a chawipui. China-ah hian kum khatah pound maktaduai 11 bawr vel a hlawh dawn niin an tarlang.

Shanghai SIPG hian June khan Asia-a player manto ber ni turin Hulk chu pound maktaduai 49 velin an lalut a, Brazilian forward hi Zenit lama a boss hlui nen an inhrawn leh dawn tihna a ni.