Aizawl FC vannei, West Warrior vanduai
"Football-ah chuan chak loh theih a ni a, tun ṭumah match offi-cial vanga chak lo kan ni," tiin Chanmari West coach HC Zarzoliana chuan a sawi. Aizawl FC coach K. Malsawmkima chuan, "Eng team pawh lo kal se tuna kan khelh zawh chiah pawh kha lo kal leh se, kan khel leh châk, rematch kan châk," tiin inkhelh bana West Warrior ṭantute auh elna karah a sawi.
Coach tawnhriat nei ṭha ṭawng-kam aṭangin inkhel boruak a sang tih a chiang a, Zirtawpni zan Mizoram Premier League hi a hmuhnawm.
First half-ah Chanmari West goal khung pahnih chu offside vangin pawm a ni lo a, second half-ah R. Laldanmawia leh Laldampuia (Double D) te goal khung an pawm lohnaah goal-ah hian William Lalnunfela'n Aizawl FC chakna goal a khung. Double D te goal khung tur ṭha taka dangtu I League club goalkeeper Zothanmawia chu man of the match a thlan a ni.
Thathona leh phawklekna
Aizawl FC hi semifinal lut lo thei dinhmunah an ding tih a chian avangin goal khung ngei tumin defender chawpin an nawr nghal a, Chanmari West lamin I League club inhrosa hi an hlau bik hauh lo.
West Warrior keeper Lalruatpuia (Mama) leh AFC keeper Zothanmawia (T. Mawia) ten hna an ngah nghal a, hun chanve hma lama goal luh loh chhan hi keeper vang a ni a, Chanmari West ṭantute chuan match official vang an ti thung ang.
I League club-in first half chhungin vawi 14 zet goal-ah an pet a, an pet hmasak pasarih goal zawnah a kal vek. College Veng tlangval Mama'n West Warrior a chhanhim a; Aizawl FC defender pahnih Lalrinzuala Khiangte leh Ricky Lallawmawma-te ball pet a dan chu ropui tak a ni.
Aizawl FC-in an player neih zawng zawngin an nawr a ni ber a, Nigerian mid-fielder Benjamin Eniwo Onome erawh MPL game rang karah a hmanhmawh ve loh avangin minute 65-naah thlak a ni a, H. Lalbiakthanga a rawn lut tlai mah mahah a ngaih theih bawk.
Team pahnih che vel a hmuh-nawm a, goal chance a tam avangin mipui an phawklek a, hun chanve hmalam hi MPL5-a match 40 khelh tawha hmuhnawm ber ang hiala chhal theih a ni.
A offside lo!
Aizawl FC-in goal nawr an tum luatah an tlarhnung a pawp leh
ṭhin a, Dampuia leh Danmawia te an tlan chak bawk avangin West Warrior ṭantute tana auna tur a tam viau bawk.
Inkhelh ṭantirh lamah Dampuia cross chu Danmawia'n a khung a, offside vangin pawm a ni lo - referee thutlukna sawisel theih niin a lang lo.
Chanmari West veteran forward Lalawmpuia (Tuaitea) tun hma angin tlan chak tawh lo mah se theihna a nei tih Mohun Bagan striker hlui hian first half tawp hma chiahin a lantir. Tuaitea'n awmze nei taka ball a lak muan hnuah Dampuia tan a pe a, West Warrior captain hian net puar pawpin goal-ah pet mah se offside vangin pawm a ni lo.
K. Kawla Stand-a ṭhu Chanmari West ṭantuten thil thlen dan an hmu chiang a, an au hla thar chu 'a offside lo' tih a ni.
A hunah William
Second half-ah Chanmari West captain Dampuia a che ṭha chhun-zawm a, Kawrtethawveng tlangval ball pet ṭha zet chu AFC keeper T. Mawia'n a dang hman. Dampuia bawkin AFC tlarhnung ṭhawng zuiin a ball pass chu Danmawia tan goal khung ngeina tur niin lang mah se T. Mawia'n hming ṭhatna atan a lo hmang thung.
Minute 76-naah Aizawl FC wing back Ricky cross chu William-a'n a tauh goal a, goal khat luh hnuah West Warrior an tho thei lo. First half angin inkhel a hmuhnawm tawh lo a, K. Malsawmkima hote 1-0 in an chak.
Pathumna West Warrior
Chanmari West-in Champhaiah I League club hi goal khat thoa an hneh avangin head to head ah ṭha zawk an awm lo a, point hmuh zat inangah goal difference en niin Aizawl FC hi palinaah an awm a, West Warrior pathumna an la ni.
Inkhelh banah West Warrior coach HC Zarzoliana chuan, "Offside leh side lo pawh hre hrang thei lo match official kan nei hi pawi ka ti a, anmahni vanga chak loah ka inngai. Ball kal dan kha thlir se a offside thei lo hrim hrim. Match li khelh tur kan la nei a, pathumna la ni tho mah ila kan la him lo. Point hi a hlu a, point khat hian semifinal min hruai thleng thei a ni. Official-te hi in en let se a ṭha ang," tiin a ṭawngkam aṭangin a lungawi lo tih chiang hle.
Rematch?
Aizawl FC leh Chanmari West hi league round-ah intum dawn lo mah se knockout stage-ah erawh la intum leh thei an ni. An intawng leh a nih ngat chuan Zirtawpni zana Lammuala thil thleng avangin ngaihven a hlawh sawt ang.
Aizawl FC boss Mala chuan, "Champhaiah khan kan vanduai ka ti a, tunah hian chak kan phu a, kan chakin ka hria," a ti a, hemi lai hian Chanmari West mipui lungawi lo thawm a ṭha hle.
Mizo coach zinga sulhnu nei ṭha ber zinga mi Mala'n sawi chhunzawmin, "Kan duh ber chu chak a ni a, kan chak avangin kan lawm. Ka naute khelh danah pawh ka lawm khawp mai. Amaherawhchu kan hmabak inkhelah kan chak loh chuanin semifinal lut lo thei kan ni. Chutihrualin champion kan tum avangin eng team pawh lo kal se tuna kan khelh zawh chiah pawh kha lo kal leh se, kan khel leh châk, rematch kan châk," tiin West Warrior nen khelh nawn leh sak a duh thu a sawi lang.
ZoFooty Statistics
Chanmari West FC 0 - 1 Aizawl FC
AFC : William Lalnunfela 76'
MoM : Zothanmawia, AFC
50% Ball Possession 50%
10 Shots 22
6 On Target 15
1 Yellow Cards 1
0 Red Cards 0
Powered By Rainbow Multibrand
Mobile Showroom
Tute nge inlan?
Chanmari West (4-1-4-1) : Lalruatpuia; Racy K. Lalremmawia, Toky Zomuanpuia, R. Lalawmpuia, Vanlalzuia Hnamte; K. Lalnunzama; R. Laldanmawia, Lalbiakhlua (Lalmuansanga 77'), Lalmuanzuala (R., Lalremruata 86'), Laldampuia; PC Lalawmpuia (H. Lallianzama 71').
Aizawl FC (4-3-3) : Zothanmawia; Lalhriatrenga, Lalramchullova, Lalrinzuala Khiangte, Ricky Lallawmawma; Rohmingthanga, Bright Middleton Mends, Benjamin Eniwo Onome (H. Lalbiakthanga 65'); Albert Zohmingmawia (F. Lalremsanga 75'), William Lalnunfela (VL Ṭhazuala 90+1'), Brandon VL Remdika.