Man City chungah Chelsea

Manchester City-in Champions League-ah Barcelona sawp thei mah se Premier League-ah erawh a chung ber aṭanga paih thlak an ni a. Hmahruaitu thar chu Stamford Bridge-a Everton 5-0 a sawptu Chelsea an ni.

Pep Guardiola hoten Inrinni zan khan Middlesbrough an mikhual a, Etihad Stadium-ah inkhel an thunun ang ngeiin Sergio Aguero hmangin minute 43-naah goal khung hmasa mah se Boro-in injury time-a Marten de Roon goal hmangin an sut. City hian November 2009 hnua a vawi khatna atan an mualah a zawnin league match thumah an khingpuite an draw.

City chetsualna hmang ṭangkaiin Chelsea-in Eden Hazard goal hnih bakah Marcos Alonso, Diego Costa leh Pedro te goal hmangin Everton 5-0 in an sawp. Blues hian point 25 hmuin league hmahruaitu thar a ni a, amaherawhchu nizan lama Arsenal leh Liverpool te point hmuh danin table awmdan hi a la nghawng thei ang.

Tlarhnung pawp

Manchester City-in inkhel an thunun a, Boro hna ber chu goal venhim a ni. Aitor Karanka hoten goal khung an tum lo ang hialin a ngaih theih a, chutichung chuan City-in vawi tam Boro tlarhnung an su pawp a, goalkeeper Victor Valdes a rim hle.

Boro-in si phur loin first half an hmang tluan thei lo a, minute 43-naah Kevin de Bruyne ball fing tak chu Sergio Aguero-a'n a tlawh goal. Argentine forward hian English club tana goal 150 a khungna chiah a ni a, goal dang erawh a khung belh thei lo.

Aguero goal khung tur siamtu De Bruyne pawhin second half-ah keeper Valdes-a tihsual a hmang ṭangkai thei lo a, City-in an tawrh phah bawk. Injury time-ah George Friend-a cross chu Marten de Roon-a'n hnai tak aṭangin na zetin a tauh goal a, Dutch midfielder hian Boro tana a goal hmasa ber a khung.

City-in tun season league match 11 an khelh tawh zinga vawi kuaah goal an chhuah vek a, Pep-a hote tlarhnung hi a phui ṭha lo tih a chiang hle.

Lawm leh lawm lo

Manchester City manager Pep Guardiola chuan, "Chak turin kan theihna zawng zawng kan pe a, inkhel pawh kan thunun. Hun tawp dawna goal kan chhuah hi a pawi hle a ni. Goal khat kan khung hnuah goal dang khung belh theihna tur vawi ruk aṭanga vawi sarih lai kan nei a, kan hmang ṭangkai lo. Kan striker ten goal an khung loh avangin kan muala match hnuhnung pathumah point ruk kan hloh phah," tiin tlarhnung lam mawhpuh loin tlarhma lam a sawisel.

Middlesbrough manager Aitor Karanka chuan, "Hlawhtlinna duhawm tak a ni a, first half-ah khan kan khingpuite kha kan ngaisang mah mah a ni. Halftime-ah khan goal venhim chauh kan tum tur a ni lo tih ka hrilh a, second half-a kan khelh dan ang khan kan khel thei tih ka hriat vang a ni," tiin an khelh dana a lawm thu a sawi.

Boro hi club lian lakah an huaisen a, table hmahruai thei dinhmuna ding Arsenal an draw tawh bawk. Karanka chuan, "City ai hian kar hnih liam taa kan khingpui Arsenal kha an harsa zawk a, khatianga team ṭha pawh kan dan theih avangin kan team hian theihna sang tak kan nei a ni," tiin City aia Gunners khelh an harsat zawk thu a sawi.

Kum 25-a upa Marten de Roon chuan, "City tana Aleix Garcia a lut ka hmuh khan ka zuan khum thei tih ka hria a, ball cross kha a kawh ṭhat avangin dan theih a ni lo. Goal ka khung hnu kha chuan engmah ka hre tawh lo a, mipui lamah ka tlan phei a, tawp chin nei loin ka hlim a ni ber," tiin goal a khung avanga a lawm thu a sawi.

5 star Chelsea

Chelsea-in season bul ṭan ṭha Everton lakah goal nga an khung thei a, Conte kaihhruai London club hi league nomawi chawi turin an ṭha tawk.

Minute 65-naah Blues-in goal ngana an khung avangin Stamford Bridge-a mikhual Toffees ṭantute tam zawk chuan hun tawp hmain an stadium an chhuahsan tawh. Inkhelh bana la cham bang chin chuan Chelsea player te an chawimawi a, goal hnih khungtu Hazard chu a phu ang ngeiin nasa lehzuala chawimawi a ni.

Belgian striker Romelu Lukaku chet theih loh zanah a hnampui Hazard a ropui a, Premier League an champion ṭuma a ṭhat ber hun ang kha kan hmu nawn leh a ni ber. Chelsea boss Conte pawhin, "Ball tel leh tel loin Hazard hi player ṭha tak a ni a, khawvela player
ṭha ber zinga mi a ni," tiin a chhuang hle.

Italian manager Conte chuan sawi chhunzawmin, "Kan khel ṭha em em a, league hmahruaitu kan nih hi inrintawkna atan a pawimawh a ni. Chutihrualin Everton kan hneh hi chu kan theihnghilh a ṭha a, inkhel pawimawh dang hmachhawn turin kan inpeih a ṭul a ni," tiin hmasawn zel an mamawh thu a sawi.

Everton manager Ronald Koeman chuan, "Chelsea leh Everton kha kan inthlau lutuk a, thu lawmawm awmchhun chu tuna kan inkhel khan point thum bak a keng tel lo tih zawng a ni. Chelsea player-te kha chak tumin an tui hal a, champion an tum a ni. Ka team-te erawh kha aia ṭhaa khel turin ka beisei, kan chak loh chhan kha game plan ni loin rilru put hmang a ni," tiin an khingpui an tluk lo tih a pha lo.