World number 1 thar Murray

7th November, 2016

Roger Federer leh Rafel Nadal ten hun rei tak chhung tennis khawvel an awp hnuah Novak Djokovic a rawn lang a, Serbian star hian chawlhkar 122 chhung a chung ber dinhmun a luah hnuah Andy Murray a hun a thleng ve leh ta! Association of Tennis Professionals (ATP) ranking chhuak thar berah chuan Britain tlangval Murray hi world number 1 a ni tawh ang.

Djokovic tan number 1 ni chhunzawm zel turin Paris Masters-ah chetsual a thiang lo a, Serbian tlangval hian beisei phak loin quarterfinal-ah Marin Cilic chu 6-4 ,7-6 (7-2) in a hneh lo. Hetih lai hian a elpui Murray erawh semifinal-a hmachhawn tur Milos Raonic chu hliam vanga a inhnuhdawh avangin final a lut thung - nizan khan Murray leh John Isner ten final khel zuiin result kan hre hman lo.

Kum 29-a upa Murray hian kuminah hian tennis a khelh tawh hnua a khelh
ṭhat ber ṭum tawngin match 73-ah hnehna a chang tawh a, Wimbledon champion a nih bakah Rio Olympic gold medal a la bawk.

Grand Slam vawi thum champion tawh Murray chuan, "Ka elpui player-te an ṭhat em avangin a nihna takah chuan world number 1 nih hi ka beisei ngam chiah ngai lo. He hun thleng tur hian kum tam tak chhung chu rim takin ka thawk a ni," tiin a sawi.

Kum 1973 aṭang khan ATP ranking hi mu-mal taka chhinchhiah a nih hnuah Murray hi world number 1 ni thei player 26-na chiah a ni; kum 1974 khan khatih hunlaia kum 30-a upa John Newcombe chu number 1 a lo ni tawh a, ani hnuah chuan Murray hi ATP number 1 vawi khat nihnaa upa ber a ni.

Kumin Grand Slam tournament hmasa pahnih Australian leh French Open final-ah khan Murray hian Djokovic a hneh lo a, a kum rualpui lakah hnehna a chan hleihtheih loh avangin khawvela player ṭha berte zinga mi ni chungin number 1 dinhmun a luah ve thei dawn lo a ngaih a ni.

Mahse, beisei angin thil a kal vek bik lo. Wim-bledon leh US Open bakah Olympic-ah Djokovic a hlawhchham vek a, hemi hnuah pawh beisei a phak lo chhun-zawm. Hetih lai hian Murray erawhin tun hnaiah Wimbledon, Beijing, Shanghai Mas-ters leh Vienna-ah te hlawhtlinna changin tun din-hmun hi a thleng ta a ni.