Bayern leh Hoffenheim inhnehtawk

Mizoram team nena Lam-muala inkhel tawh TSG 1899 Hoffenheim chu Inrinni zan khan Bayern Munich khelmualah leng lutin goal khat ve ve khungin an inhnehtawk. Inkhel dangah Borussia Dortmund chuan Hamburg 5-2 in an sawp thung.

Allianz Arena-a inkhelah mikhual Hoffenheim lamin goal hnih an khung a, goal hmasa zawk chu minute 16-naa Kerem Demirbay-a'n Bayern keeper Manuel Neuer dan hman loin kawh zetin a pet lut. Goal hnuhnung zawk erawh Hoffenheim midfielder Steven Zuber-a'n an lama a tih luh a ni.

Carlo Ancelotti naute hian Bundesliga match 10 khelh aṭanga point 24 hmuin anni ang thoa hneh loh la tawng lo Hoffenheim hian point 20 an nei thung. Kai thar RB Leipzig chuan nizan khan Mainz an hmachhawn a, hnehna an chang a nih chuan Bayern hi an nihrual ang.

Italian manager Ancelotti chuan, "Bul kan ṭan fuh lo a, goal pawh kan chhuah reng a ni. Second half-a kan khelh dan thlir kha chuan point thum hmuh kan phu hlein ka hria. Goal khung tumin vawi 21 zet kan pet a, vawi khat mah kan khung thei lo kha chu kan vanduai a ni. Chutih rualin Hoffenheim khan point hmu khawpin an khel ṭha ve tho," tiin a sawi.

Kum 29-a upa Hoffenheim manager Julian Nagelsmann chuan, "Ka naute hian point hmuh an phu, Allianz Arena-a point khat hmuh hi a chhe lo," a ti. Nagelsmann hi Bundesliga chanchina manager naupang ber ni turin February 10, 2016 khan head coach a tan ruat a ni, tunah hian league-ah match 10 chhung hneh loh nei loin an kaltluang mek.

Aubameyang-a show

Pierre-Emerick Auba-me-yang-a'n Borussia Dort-mund tan inkhel bul ṭanin goal li a khung bakah Ousmane Dembele goal khung tur a siamsawk bawk. Table mawngphaha awm Hamburg goal hnih hi Nicolai Mulle-a khung a ni thung.

Nilaini zan Champions League-a Sporting Lisbon an hneh ṭumin Aubameyang chu squad aṭanga dahchhuah a ni a, manager Thomas Tuchel-a'n a striker khelh loh chhan chu chhung lam buaina vang a nih thu leh a sawi zau duh loh thu a sawi bakah Hamburg a hmachhawn tur thu a sawi lawk a, a thusawiah a dingnghet.

Gabon international Auba-meyang hian minute 23 chhunga hattrick (4', 23', 27') a siam bakah second half-ah goal khat a khung belh bawk. Tun season-ah Dortmund tan Bundesliga leh Champions League-a a goal khung zat belhkhawm chu goal 13 a ni leh der tawh.

Dortmund hian point 18 hmuin league table-ah pangana an ni leh ta a, hmahruaitu Bayern Munich an phak lohna chu point ruk a ni mek. Hetihlai hian Hamburg erawhin an mangchhia an la harhchhuah san thei lo a, point hnih hmu^-in a hnungdawltu an nih chhun-zawm zel.

Dortmund coach Tuchel chuan, "Goal li khung hi chu mi bik tan chauha tih theih a ni, thiam bakah khelh ṭhat a ngai. Aubameyang tel lo chuan goal khung a harsa ṭhin a, ani a awm chuan thil a awlsam vek mai a ni," tiin a player goal li khung thei a fak hle.

Dortmund hian Hamburg khelmualah hian league match bikah result ṭha an nei hleithei lo ṭhin a, match nga an khelh aṭangin tun ṭum hi point thum an hmuh vawi khatna a ni.

Tuchel chuan sawi chhun--zawmin,"Tun hnaiah duhthu-sama ṭha result kan neih loh avangin boruak a rit a, tunah erawh inkhelh hasatna hmunah hnehna kan chang ta. Kan dinhmun hi hun rei lote chhunga teh tur a nih loh avangin
ṭha taka khelh chhunzawm a pawimawh ang," a ti.