Magpies an kal zel

Season thara Premier League khelh leh ngei tum Newcastle United-in Championship division lama khel tur chuan an ṭha mah mah tih lantir nan a zawna a vawi sarih nan hnehna an chang - Magpies hian Inrinni zan khan Cardiff City chu 2-1 in an hneh a ni.

Rafael Benitez-a enkawl team tan hian Chris-tian Atsu chuan minute 3-na lekah goal hmahruai a khung a, Yoan Gouffran chuan chawlhlawk hman a nih hma lawkin an goal hnihna a khung ve bawk. Welsh club tan substitute Peter Whittingham-a'n goal khat khung ve mah se goal a khung dawn hian hun tawp nan minute 13 chauh a awm tawh a, Cardiff tan tho leh turin hun a awm tawh lo.

League match sarih chhung a zawna chak thei Newcastle United hian match 16 an khelh tawh aṭanga point 37 hmuin hmahruaitu an ni mek a, anmahni hnaih bertu Brighton chuan vawi 16 khelhah tho point 34 hmuin pahnihna an ni.

Newcastle manager Rafa Benitez chuan, "Ṭha takin inkhel bul kan ṭan a, chance pawh vawi tam insiamin goal hnih kan khung. Second half-ah pawh bul kan ṭan ṭha viau a, mah se chawlhlawk hmaa kan khel erawh kan phak tawh lo," tiin an inkhel chungchang a sawi.