Highlanders hmaah Mumbai an zuang sang

NorthEast United-in season duhawm taka bul an ṭan hnuah beisei an phak lo chhunzawm a, Inrinni zan khan an mikhual Mumbai City chu 1-0 a an hneh loh avangin match thum chhung a zawnin chak hmel an hmu ta lo. Minute 45-naah Manipur winger hian Highlanders goalkeeper Wellington Lima tihsual nangchingin goal a khung a, tun season ISL-a inkhel bul a ṭan hmasak berah fak phu khawpin a khel.

Mumbai City tan dan pangngaiin Lalhmangaihsanga Ralte chuan inkhel bul a ṭan a, Aizawl FC midfielder hlui David Lalrinmuana erawh bench lamah hun a hmang tluan thung. NorthEast United lamah a vawi khat nan Lallianzuala Chhangte chu inlan mah se bench aṭanga tlanlut Lunglei rawlthar hian danglamna a thlen thei bik lo.

Zirtawpni zan khan Delhi Dynamos chuan an mikhual Kerala Blasters chu 2-0 in an hneh bawk. First half-ah team pahnihin goal khung lo mah se second half erawh mualneitu chan a ni a, Delhi tan Kean Lewis leh Marcelinho chuan minute nga chhunga goal hnih khungin an team hi hnehna an chanpui a ni. Delhi tan season ṭantir lama regular player Lalchhawnkima chuan inkhel bul la ṭan lo mah se second half-ah tlan luhtir a ni thung.

Mimal Lawmman

NorthEast United 0 - 1 Mumbai City

Emerging Player of the Match Jackichand Singh, Mumbai City

Hero of the Match Lucian Goian, Mumbai City

Delhi Dynamos 2 - 0 Kerala Blasters

Emerging Player of the Match Souvik Chakraborty, Delhi Dynamos

Hero of the Match Anas Edathodika, Delhi Dynamos

*Zaninah inkhel a awm lo ang