Atletico kalkawngah Real Sociedad

Inrinni zan La Liga inkhelah Atletico Madrid kalkawng dalin a awm a, champion beisei Madrid khaw club hi an mikhualna ramah Real Sociedad chu 2-0 in an ngam lo - Sociedad tan league match thum chhung a zawna hnehna an channa a ni.

First half-ah team pahnihin goal khung lo mah se chawlhlawk hman a nih hnuah Arsenal striker hlui Carlos Vela a inlar a, kum 27-a upa striker hian minute 54-naah Atletico midfielder Gabi-a'n Yuri Berchiche a tih tluk vanga an penalty hlawh chhuah chu an hmahruaina goal ni turin a khung.

Atletico-in an si phurh an sut hmain beisei loh zawk Real Sociedad bawkin goal an khung leh a, penalty aṭang bawk-in a ni - penalty hlawh-chhuaktu hi goal hmahruai khungtu Vela a ni a, Mexico international hi Angel Correa chuan penalty area-ah ti tluin Willian Jose-a'n an goal hnihna khung nan a hmang.

Atletico Madrid coach Diego Simeone chuan, "Chhuanlam zawn ka tum lo a, penalty pahnih kha pekna tur dik tak ve ve a nih avangin referee khan thutlukna dik tak a siam a ni. Real khelh
ṭhat avangin kan tlawm a, keini chuan kan hun ṭha neih kan chhawr ve thei lo," tiin chak phu zawkin hnehna an chan thu a sawi.