Falcao a lo kir leh ta

Manchester United leh Chelsea-a season duhawm lo zet a hman hnuah Radamel Falcao chuan Ligue 1 lamah a thiamna a pholang ṭan leh ta - Colombian striker hian Inrinni zan khan Nancy 6-0 a an sawpna inkhelah goal hnih a khung a, Monaco tan a match hnuhnung paliah goal nga a khungna a ni ta.

Kum 30-a upa striker hian kar hmasa khan Champions League group stage-a CSKA Moscow 3-0 a an hneh ṭumin goal hnih a lo khung tawh bawk. Nancy an hnehna inkhelah hian Falcao bakah hian Guido Carrillo, Fabinho leh Kylian Mbappe te chuan goal khat ṭheuh an thawh ve bawk.

Colombia tan vawi 62 inlana goal 25 khung thei striker chuan, "Nuam ti takin ka khel a, match tam zawk ka khel ang a, ka hmasawnna chu hmuh tur a awm zel ang," tiin khawvela striker hlauhawm ber pawla sawi ṭhin chuan a ṭhat dan bera khelh chhuah leh ngei a tum thu a sawi.