Moyes tan Sunderland chak ve ta
David Moyes-a enkawl Sun-derland chuan tun season-a a vawi khat nan Premier League-ah hnehna an chang ve ta! A zawna match 10 zet chak ni hmel an hmuh loh hnuah Black Cats hian Bournemouth 2-1 in an hneh.
Inrinni zan inkhelah Bourne-mouth tan minute 11-naah Dan Gosling chuan tun season-a a goal thumna khungin Cherries hma a hruai pui a, mikhual Sunderland tan Junior Stanislas leh Joshua King ten an hunṭha an bawhpelh hnuah Victor Anichebe-a'n first half tawp hma hretin an si phurh a sut.
Second half-ah Steven Pienaar chu yellow card vawi hnih hmuh vangin hnawhchhuah a ni a, Arsenal hneh lo hlim Black Cats manager Moyes dinhmun a derthawng chhun-zawma zel. Mahse, minute74-naah Jermain Defoe chuan a club hlui lakah penalty chhuih lutin chakna goal a khung - Defoe goal hian a club leh an manager Moyes a chhanhima ngaih a ni. Kum 34-a upa Defoe hian Premier League club hrang hrang 38 a hmachhawn tawh aṭangin club 35 lakah goal a khungna chiah a ni.
Chakna goal khungtu Defoe chuan, "Kan hnehna chan hi manager leh min phatsan ngai lotu fan-te tan a ni a, anni hi kan tana an hlutna hi sawifiah thiam theih a ni lo," a ti.
Sunderland boss Moyes chuan, "Vawi khat hnehna kan channa a ni a, hnehna chan chhunzawm kan mamawh. He club-ah hian player leh hnathawk zawng zawngte hian tihtakzetna thinlung kan nei a ni tih a lanchhuah zel ka duh a, point thum dang kan hmuh chhunzawm zel ka beisei," tiin a sawi.
Everton boss hlui Moyes hian kum 2014 April thlaa Newcastle a hneh hnuah Premier League match-ah bik chakni hmel a hmuh lehna hmasa ber a ni a, ni 945 hnuah chak ni hmel a hmu ve leh ta a ni.
Bournemouth manager Eddie Howe chuan, "Hull lakah goal ruk kan khung hnuah a zawnin match thum chhung goal khung kawngah harsatna kan nei ta a, a chinfel dan ngaihtuah ran a ṭul," tiin goal khung tura inzir an mamawh thu a sawi.
Sunderland hian point nga hmuin table mawngphah la chhuahsan lo mah se an chung chiaha awm Swansea nen an point a inzat a, 18-na Hull an phak lohna pawh point hnih chiah a ni ta.