AFC Cup final Bengaluru-in Iraqi Air Force hneh lo
I League champion Bengaluru FC-in India football chanchin ziah danglamna hun remchang nei mah se an hun ṭha neih an chhawr ṭangkai thei lo - Inrinni zan khan AFC Cup final-ah Iraqi club Air Force chu 0-1 in an hneh lo. Bangalore club hi kut ruakin an haw bik lo a, Fairplay award pek an ni.
Qatar SC Stadium, Doha khawpuia inkhela player langsar ber chu Iraqi striker Hammadi Ahmad a ni. AFC Cup Most Valuable Player-a thlan zui striker hian minute 71-naah Champhai tlangval Lalthuammawia Ralte goal venah a chhuih lut a, inelnaah vawi 11 inlanin goal 16 a khung a, top scorer a ni bawk.
Inkhel chu
Inkhel ṭan a nih hma hauhin Benga-luru-in thawm an nei lian a, Indian club hi Arsenal legend Thierry Henry, Robert Pires, Barcelona midfielder Ardan Turan leh Premier League club Tottenham Hotspur ten nomawi chawi ngei tura an duhsakna thu twitter lamah an tarlang.
India club hian khelmual pawn lama an boruak hi khelmual chhungah an chhawm thei lo a, captain Sunil Chhetri-a thiamna hmuh turin awm fo mah se Sporting Lisbon B striker hlui hian thlawptu a nei ṭha tawk lo a, Khasi midfielder Eugeneson Lyngdoh-a'n a hun ṭha neih a chhawr ṭhin lo bawk.
Air Force lamin Emad Majeed hmangin hun ṭha nei hmasa mah se Bengaluru keeper Thuama a inrawlh hman a, Champhai tlangval hian Amjed Radhi-a'n Bengaluru offside trap siam a bum hnua pet goal theihna hun a neih chu a thlawnah a chantir bawk.
Minute 71-naah erawh Thuama a che fuh reng thei bik lo. Bengaluru defender rualin Amjad Radhi an ven zawh loh hnuah Iraq international striker hian ven loha awm Hammadi Ahmed a hmu fuh a, kum 27-a upa striker hian goal a thun ta.
Thutlukna dik lo?
Bengaluru coach Albert Roca-a'n AFC Cup nomawi chawi ngei a duh avangin second half-ah risk lain substitution a siam a, beisei phak lo Nishu Kumar leh Alwyn George lachhuakin hliam damkawr Udanta Singh leh Seminlen Doungel a luhtir.
Barcelona assistant coach hlui hian 3-5-2 a formation thlakin wing back-ah khel ṭha Rino Anto leh wing back-a la khel ngai vak lo Udanta Singh te a chhawr.
Galatasaray assistant hlui hian a thutlukna siam fuh tawk loh a tuar a, 3-5-2 formation an hman hnu lawkah Air Force lamin goal an khung nghal.
Bengaluru-in hun tawp lamah chhanletna remchang nei ṭhin mah se Iraqi defender rual paltlang an harsat a, chak lo zawkah an ṭang.
Albert Roca chuan, "Goal khung vat a, tlarhnung rem phui vatin kan chak thei tih ka hria a, chumi hmang chuan risk kan la. Mahse, kan vanduai a, goal khung kan tum luatah kan chhuah ta zawk a ni," a ti.
Spanish manager chuan, "Air Force club ka lawmpui a, chak an phu zawk. Dik taka sawi chuan hetianga level sangah an la khelh ngai loh avangin ka naute an zam a ni. Final meuh thlen erawh thil awlsam a ni lo a, vawiin hi kan tan chuan bul ṭanna chauh a ni. Kan hmabakah hnathawh tur tam tak kan la nei a, final dang khel turin tun aia ropui zawk hian lokir kan tum," tiin Bangalore club tan tawpna tur a la nih loh thu a sawi.
Thuama a lawm
Bengaluru tana goal vengtu Thuama chuan, "Champion zo ta lo mah ila kan thlen chin ringawt pawh hi a ropui a, hnualna em em tur awmin ka hre lo. Final boruak hi danglam
ṭhin mah se harsatna leh zamna nei miah loin ka khel thei. Tun aia nasa zawkin ka ṭang ang a, he club-ah hian hmun pawimawh chan zel beisei chungin season thar ka thlir leh der tawh a ni," tiin an thlen chinah a lawm thu Vanglaini palai a hrilh a, Bangalore club-ah cham chhunzawm a tum bawk.
Champhai tlangval chuan Mizo mipui chungah lawmthu sawi nghalin, "Min ṭantu Mizo mipuite chungah lawmthu ka sawi a, social media leh phone kaltlanga duhsakna thu min hlantu zawng zawng chungah ka lawm em em bawk. Nomawi chawi ngei inbeisei mah ila Pathianin kan tana ṭha turin rem a ruat tih ka hria a, vuina tur ka nei lo," a ti.
Mizo keeper hi inkhelh zawhah coach Albert Roca chuan, "A khel ṭha tak-zet a, a awmna tur dik takah a lo awm zel a ni. Kan player neih zinga a ṭha ber pawl a ni a, second half-ah khan vawi tam min chhanhim tih chu in hmu ang. Ka hnuaia a vawi khat inlanna a ni a, a tan a awlsam lo a ni," tiin a fak.