India champion puitu Ruatfeli

Rio Olympic hmeichhe hockey-a India aiawha kal tawh H. Lalruatfeli khelhna India team chuan Inrinni zan khan China 2-1 a hnehin a vawi khat nan Women's Asian Champions Trophy 2016 cham-pion nomawi an chawi.

Sengkang Hockey Stadium, Singapore-a inkhelah India hian minute 13-na lekah penalty corner chhawr ṭangkaiin Deep Grace Ekka goal hmangin hma an hruai a, Asian powerhouse tia sawi ṭhin China tan Zhong Meng-ling-i'n sut ve mah se hun tawp hma chiahin Deepika Tha-kur chuan chakna goal a vaw lut.

Asian Hockey Federation chuan Women’s Asian Champions Trophy 2016 thleng tur hian Singapore Hockey Federation a ruat a, October 29- November 6 chhung khan Sengkang Hockey Stadium-ah an inkhel. India bakah hian Asia khawmualpuia ram
ṭha pali dang China, Japan, South Korea leh a thlengtu Ma-laysia te an inel. Ram pa-ngate hi an in-khelh kual hnuah a sang pahnihin final hi an khel a ni.

India hian Women's Asian Champions Trophy hi tun hma lamin a la chawi ngai lo a, kum 2013 khan final-ah Japan hneh loin pahnihna an ni tawh a, inelna neih ṭan kum (2010) khan pathumna an lo ni tawh bawk.

Hockey India (HI) chuan champion team player leh chief coach Neil Hawgood te chu cheng nuai hnih ṭheuh an pek tur thu an puang nghal.

Olympian Ruatfeli chuan, "Mizo mipuite min ṭawngṭai puina vanga hetiang dinhmun thleng thei hi ka ni a, Pathian kaihhruaina zara hetiang hun ka tawng thei hi ka lawm tak zet," tiin Vanglaini palai a hrilh. India defender hian hockey chu Mizote khelh thiam chi leh khawvel hriat kan nih theihna tura infiamna ṭha tak a nih thu a sawi tel bawk.

South Lungleng nula Ruatfei hi Asian Champions Trophy 2016-ah hian India ban rinawm niin match li an khelhah a inlan kim vek a, final-ah pawh hian inkhel bulṭantu zingah ṭangin a khel tluan a ni.

Tun ṭumah hian Ruatfeli bakah hian Lalhlunmawii pawh koh mai theih tur (standby) ah dah a ni. Mahse, Neihloh (Serchhip District) khaw nula Hlunmawii erawh inbuatsaihna lamah a inhliam avangin Malaysia-ah hian a kal thei ta lo a ni.