Champion kawnghren nen Pacman a lo kir

April, 2016-a Timothy Bradley-a hneh hnua boxing a chawlhsan thu puangtu Manny Pacquiao-a'n boxing glove bunin ring chhungah a lo kir leh a, nimin zing khan WBO welterweight champion Jessie Vargas hnehin champion kawnghren nen boxing khawvel a luhchilh leh ta.

Kum 37-a upa Pacman leh a khingpui Vargas te hi kum 10 laiin inthlau mah se ring chhunga player tharum ngah leh thawkrim zawk chu Pacquiao a ni a, ṭum dang ang bawkin Filipino boxer hian attacking game hmuhnawm a khel - a phu ang ngeiin Pacman a chungnung a, 114-113, 118-109, 118-109-in chak zawkah puan a ni.

October 2015-a 'Fight of the century' tia hminglem an phuahah Manny Pacquiao-a'n Floyd Mayweather a ngam lo a, Las Vegas-a Pacman inhnek hi American boxer hian a en. Mayweather hian inhnek zawhah Pacquiao hi a lawmpui tih lantir nan a kutzungpui chu van lam hawiin a tilang a, "I ti ṭha e" tiin a duhsakna a hlan.

April-a boxing a chawlhsan thu a puan hnu lawka Philippines ram inthlanpuia senator ni tura thlan tlin Pacquiao chuan, "Mayweather hian ka sawmna ngai pawimawhin kan inhnek a rawn en a, ani nen hian kan inhnek leh dawn leh dawn loh chu hunin a la hrilh ang chu," tiin a sawi.

Mipui 20,000 dawn pungkhawm hmaa hnehna changtu Pacquiao chuan, "Ka inkhelh danah ka lawm takzet a, round tinah khan nuam ti takin ka khel vek a ni. Zanina min ṭantu heti zozai lo pungkhawm te hmaa ka inthiam lohna awmchhun chu ka beisei anga Vargas ka knockout thei lo kha a ni," tiin chak mah se a lawm erawh a kim lo.