Premier League goal 25,000-na khungtu Zlatan
Manchester United-in match li chhung Premier League-a chak hmel an hmuh loh hnuah Pathianni zan khan Swansea 3-1 in an hneh. Welsh club erawh season ṭan nia Burnley an hneh hnuah chak an nei leh tawh lo a, manager thar Bob Bradley hnuai-ah match li khel tawhin point khat chiah an la hlawh chhuak.
Jose Mourinho hote ten first half an thunun a, khawvel footballer manto ber Paul Pogba-a'n minute 15-naah goal ropui khungin Zlatan Ibrahimovic-a'n goal hnih dang a khung belh. Swede forward Zlatan hian Premier League goal 25,000-na a khung bakah club career-a goal 400-na a khung bawk.
Tlarhnung pawp
Liberty Stadium-ah United-in first half an thunun a, Jose Mourinho-a'n tlarhnung phuah-chawp deuh mah se Swansea-in hun chanve hma lamah an tibuai thei lo.
Portuguese manager Mou-rinho-a'n defence laiah Marcos Rojo leh dam kawr Phil Jones te a inkawptir a, right back-ah midfielder Ashley Young leh left back-ah Matteo Darmian te a dah bawk. Heng player pali hi hun tawp lamah erawh an talbuai a, Swans defender Mike van der Hoorn-a'n minute 69-naa Gylfi Sigurdsson's freekick pet chu a tauh goal.
United legend Paul Scholes-a'n 'Tun dinhmunah United-in goal an chhuah zel avangin chak tur chuan goal thum tal an khung zel a ngai' tia a lo sawi tawh chu a thleng dik.
Hrem hmabak Zlatan
Paul Pogba telna United midfield an chungnung a, veteran midfielder Michael Carrick a ṭangkai tih hmuh hmaih a thiang lo. Captain Wayne Rooney chu goal zawng zawngah a inrawlh vek a, England captain hian tih ṭhat ngat mah se tihsual a ngah ve tho avangin tun hma erawh a pha tawh lo.
United-in goal thum an khung hnuah hrem vanga techncial area-a awm lo Jose Mourinho-a'n substitute a siam lawk lo a, goal an chhuah leh bawk si avangin nuam sa takin point thum an hlawh chhuak lo. Goal hnih khungtu Swede forward Zlatan-a'n yellow card a hmu a, hrem vangin November 19 zana Arsenal an mikhual hunah a inlan ve thei lo ang.
Bradley thukhawchang
Swansea manager Bob Brad-ley chuan, "First half-ah min nawr bet a, ball channa hun kan nei lo a, kan neih chhun kan hmang ṭangkai lo bawk. Kan hneh lo zawk nachungin an goal shot hmasa pathum goal-a a luh vek erawh a mak ang reng khawp mai. Second half-ah kan insiamṭha a, chak tur khawp erawh chuan harhtharna kan chang lo," tiin inkhel a hmuh dan a sawi.
Zlatan faktuin sel a nei
Portuguese manager Mou-rinho chuan, "Goal khung tura chance a siam ṭhin miau avangin ka hlauthawng ngai lo. Goal a khung leh thuai hi ka ring a, a dikna chu khelmual chhungah a lang a ni. A pawimawh ber erawh Zlatan-a goal khung lam ni loin kan team chakna hi a ni," tiin Zlatan a fak.
United manager Mourinho chuan, "Smalling-a'n inhliam vangin 100% in a khelhchhuah theih loh thu min hrilh a, Shaw-a'n inkhel tura a inpeih loh thu min hrilh bawk," tiin inkhelh hmain defender pahnih khelh theih loh thu a sawi. Inkhelh banah Portuguese manager hian, "Team tan chuan eng pawh tih theih a ṭul. Mi huaisen eng harsatna pawh nei se theihna zawng zawng hlan ṭhin leh na hlekin a tihbuai player an awm. Footballer ropui pawh zawt ila, vawi tam 100% ni lo chunga an khelh theih thu an sawi ang," tiin inkhelh banah a defender pahnih hi a khak hlak.
Mourinho sawisel defender pahnih Smalling leh Shaw te hi inhliam vangin Scotland leh Spain hmachhawn tur England squad-ah telh an ni lo.
Champion lai chak lo
Premier League champion lai Leicester City-in tun sea-son-a a vawi khat nan an mual King Power Stadium-ah point an hlawh chhuak zo lo.
Pathianni zan inkhelah West Brom-in James Morrison hmangin minute 52-naah hma an hruai a, Foxes-in minute thum hnuah an sut. Riyad Mahrez cross ṭha zet chu pound maktaduai 29 man striker Islam Slimani-a'n a tauh goal. Amaherawhchu Leicester midfielder Danny Drinkwater chetsual vangin Baggies winger Matt Phillips-a'n minute 72-naah chakna goal a khung.
Leicester boss Claudio Ranieri chuan, "A awlsam lo a ni. Champions League lamah kan tha kan seng nasa lutuk pawh a ni mahna. Kan harsatna su kiang turin kan titi ho pawh a ngai ang, eng emaw fuh lo chu a awm a ni. Kan muala kan record ṭha tak thai reh a ni ta hi pawi ka ti hle a ni," tiin an result-ah a lungawi lo hle.
Hull an chak
Hull City-in manager atana Mike Phelan an dah nghet hnuah a vawi khat nan hnehna an chang a, an mualah Southampton 2-1 an hneh.
Saints hian minute 6-na lekah Charlie Austin hmangin hma hruai mah se Tigers-in Robert Snodgrass leh Michael Dawson te goal hmangin second half-ah an lehthal.
Hull City boss Mike Phelan chuan, "Robert Snodgrass-a'n ngal rek vung chungin a khel a, na reng reng nei lo ang maiin a khel ṭha a ni. Tunah hian player pathum aṭanga pali vel inhliam kan nei a, international match vanga kan chawl tur hi a lawmawm hle a ni," tiin si phurh sutna goal khungtu Snodgrass a fak.