AFC Cup Indian club sulhnu a ropui lo
Bengaluru FC-in AFC Cup final an luh hmain India club ten Asia huapin sulhnu ropui an nei ngai lo a, Bangalore club-in Inrinni zanah beisei angin nomawi chawi thei lo mah se an thlen chin ringawt pawh hi inchhuanna tham a ni.
Kum 1967 aṭang khan Asia huap club inelna Asian Champion Club Tournament ṭan a ni a, kum 1969 khan Mysore State chu India aiawha telin pathumna inchuh inkhelah Japan aiawh Toyo Kogyo chu 2-0 a hneh loin palina an ni.
Kum 1985 aṭangin inel-na hming hi Asian Club Cham-pionship tia thlak a ni leh a, East Bengal, Mohun Bagan, JCT leh Churchill Brothers te chu India aiawha he inelnaa inlan tawh Indian club an ni. Hetihlai hian India ramin league mumal a la neih loh avangin Federation Cup champion chu India aiawhin an fehchhuak ṭhin.
Asian Club Championship hi 2001-02 season thleng khan khelh a ni a, India club ten sulhnu chhuan tur hnutchhiah an nei lo. Season hnih tawp lamah India club zingah inlan thei an awm lo a, Indian club inlan hnuhnung ber Mohun Bagan chuan kum 1999-2000 khan second round lut mah se Japanese club Jubilo Iwata chuan 8-0 in an sawp.
Kum 2002-03 aṭangin Asian Club Championship chu Asian Champions League tia thlak a ni a, qualifier khelh a ngaih tawh avangin Indian club zingah Champions League group stage paltlang thei an la awm lo.
AFC Cup chu
Asia khawmualpuia football thuneitu sang ber Asian Football Confederation-in 1990-91 season aṭangin Asian Cup Winners' Cup an huaihawt ṭan a, he inelna hi domestic Cup an tih Federation Cup te ang inelnaa mahni ram champion ṭheuhin an khelh tura ruahman a ni. Kum 1991-92 khan East Bengal chuan he inelnaah hian quarterfinal an lut a, Asian Cup Winners' Cup-a India club zinga thleng sang ber an ni.
Asian Cup Winners' Cup inelna hi kum 2004 khan AFC Cup tia thlak a ni a, India aiawhin Mahindra United leh East Bengal an inlan. Federation Cup champion Mahindra United hian group stage bak an paltlang lo a, National Football League champion East Bengal-in quarterfinal an thleng thung - AFC Cup hmasa bera an sulhnu a chhuanawm hle.
Kum 2008-ah Dempo-in AFC Cup semifinal an thleng a, India club zinga a hmasa ber ni mah se semifinal-ah Lebanese club ṭha Al-Safa' SC chu 5-1 in an ngam lo.
Goan club Dempo-in hming an chher hnuah Indian club an reh vang vang a, kum 2013 khan Mizo tlangval Lalrindika Ralte khelhna East Bengal chuan semifinal an lut. Mahse, Kolkata club hian Dempo aia sang an thleng thei bik lo.
Hei le Bengaluru
Kum 2016 a ni. Kum thum chauha upa Bengaluru FC-in Indian club dang ten kum tam tak chhung an tih theih loh an ti thei - AFC Cup-ah final an lut. Bengaluru ang thoa AFC Cup khel Mohun Bagan erawhin AFC Champions League qualifier lama an hneh hnu Tampine Rovers chu last 16-ah an hneh lo a, AFC Cup-a an zinkawng an zawh tawp.
AFC Cup inelna hi neih
ṭan a nih aṭangin kumtinin India club pahnih an la tel ziah a, Federation Cup champion leh I League champion chu AFC Cup khel chiang sa an ni. I League nomawi chawitu club hian AFC Champions League lamah qualifier an khel phawt a, Asia club inelna sang ber khel tur hian an inpet tling zo lo a nih chuan AFC Cup lamah an inlan ṭhin. Indian club zingah Champions League group stage-a inpetkai thei an la awm loh avangin AFC Cup-ah club pahnih zel an inlan.
Mizo hming a mawi
AFC Cup-a Indian footballer hming lam a nih dawn chuan Mizo tlangval hming lam lohin a kim thei tawh lo. Indian player zingah AFC Cup tournament khata goal khung hnem ber ni ṭhin chu goal li khungtu India captain hlui Baichung Bhutia a ni.
Kum 2013-a East Bengal-in semifinal an luh ṭum khan Lalrindika Ralte chuan Kolkata club tan goal li a khung a, Sik-kimese striker record a nihrual. Mizo tlangvalin India football legend record a nihrual hnua record dinglai thaichhetu pawh Mizo tlangval tho a ni.
Tun season-ah Mohun Bagan-in last 16 an paltlang lo chungin Jeje Lalpekhlua-a'n goal ruk a khung a, AFC Cup tournament khata Indian player zinga goal khung hnem ber a ni.