Bale-a'n goal nen contract thar a lawm
Gareth Bale-a'n kum 2022 thleng Santiago Bernabeu-a cham tura contract thar a ziah hnu lawkah Real Madrid tan goal hnih a khung a, La Liga-a an hmahruaina chhunzawm turin a club hi Leganes lakah 3-0 in hnehna a chanpui.
Champion lai Barcelona-in Real chak zanah tlawm an duh bik lo a, an mikhualna rama goal an chhuah hmasak zet hnuah an thiampuipa Lionel Messi leh Luis Suarez goal khung hmangin Sevilla chu 2-1 in an hneh. Catalan club hian hmahruaitu Real chu point hnihin an phak lo mek.
Beisei phak lo
Real-in minute 38-naa goal hmahruai an khung hmain beisei an phak lo a, La Liga kaithar laka an khelh danah fan-te tan lawmna tur a awm meuh lo. Mahse, Bale inlar hnuah Real-in inkhel an thunun chhunzawm a, Welsh forward hian Isco through ball a tlanchakna hmanga a tlanpui hnuah Leganes goalkeeper Jon Serantes tlanhelin hmahruaina goal a khung.
First half injury time-ah Gareth Bale bawk kan hmu a, kum 27-a upa forward hian freekick aṭanga ball kal chu hnai set sawt aṭangin a khung. Leganes-in chawlhlawk hman a nih hnuah Alexander Szymanowski hmangin hun ṭha nei ve mah se Real keeper Keylor Navas chuan a lo nam per hman a, Real an vannei.
Hun tawp nan minute 14 chiah a awm tawh tihin Real bawkin goal an khung leh a, hliam vanga inlan thei lo Karim Benzema aia lut Alvaro Morata chuan bench-a dah reng atan chuan a uiawm tih lantir nan an goal thumna a khung a, Real-in point thum an hawn. Zinedine Zidane-a tana chanchin lawmawm chu hliam vanga rei tak a chawlh hnuah midfielder Luka Modric chu substitute bench aṭangin khelmualah tlan luhtir a ni.
Zidane-a thukhawchang
Real Madrid boss Zinedine Zidane chuan, "Table chung bera awm hi a nuam a, mah se match khelh tur tam tak a la awm avangin tun dinhmunah chuan uanpui chi a la ni lo. Kan match neih leh hmasak berah Atletico Madrid kan hmachhawn dawn a, international break zawhah rim lehzuala kan inbuatsaih a ngai dawn a ni," a ti.
Barca an tho
Sevilla khelmualah Barce-lona an lenglut a, Atletico Madrid laka hnehna lo chang tawh Sevilla hian beisei loh takin minute 15-naah Vitolo hmangin goal hmahruai an khung. Catalan club-in awlsam taka tlawm erawh an tum lo a, minute 43-naah Lionel Messi chuan yard 18 vela hla aṭangin an si phurh sutna goal a khung - Argentina captain hian Barca tan match 592 (friendly chhiar telin) a inlana a goal 500-na a ni.
Second half erawh Barce-lona chanpual a ni a, Sevilla tan keeper Sergio Rico chet
ṭha zan ni lo se chuan Europa League champion hi goal tam zawk chhuah thei dinhmunah an ding. Kum 23 leka upa Spanish keeper hian Croatian midfielder Ivan Rakitic pet na tak chu ṭha takin a dang a, Suarez-a backheel volley mawi tak hmangin Messi chuan hun ṭha nei mah se Rico bawk hian ṭha takin a dan sak.
Sergio Rico-a che ṭha reng thei bik lo a, minute 61-naah Luis Suarez a dan zawh loh avangin chak phu zawk Barcelona-in hnehna an chang. Uruguayan striker Suarez-a'n Liverpool aṭanga Barcelona a pan hnuah ropui zual lam a pan zel a, Catalan club tan inelna hrang hrangah match 112 khelin goal 95 a khung tling ta!
Enrique thukhawchang
Barcelona manager Luis Enrique chuan Catalan club tana a goal 500-na khungtu Lionel Messi fakin, "Leo hian khawi position-ah pawh khel turin theihna a nei a, amah anga player ṭha hi an awm miau loh avangin a theihna sang ber hmuh tum hian theihtawp kan chhuah nitin a ni. Messi khan game-a min hruaikir turin goal a khung a, amah ang thoin player dang pawh an khel ṭha em em a ni," tiin Messi chu a chhuang hle.