Buffon-a match 600 khelh niah Juve chak

Italy legend Gianluigi Buffon-a'n Serie Match 600 a khelh niah Juventus chuan khualmualah Chievo 2-1 in an hneh. Pathianni zan inkhel dangah Inter Milan leh AC Milan ten hnehna an chang ve bawk.

Champion lai Juve tan Mario Mandzukic-a'n first half-ah goal khungna hun ṭha vawi hnih a chhawr ṭangkai loh hnuah minute 53-naah goal hmahruai a khung. Chievo tan Sergio Pellissier chuan ama penalty hlawhchhuah chu goal-ah chantirin an si phurh a sut a, 1-1 chiah a ni. Team pahnih danglamna chu minute 75-naa Miralem Pjanic free kick pet luh niin Juve-in point thum an hlawh chhuak.

Kum 38-a upa Buffon-a'n Serie A match 600 a khel tling ta a, Milan legend Paolo Maldini (647), Inter defender hlui Javier Zanetti (615) leh Roma tana chuai thei lo Francesco Totti (607) te huangah a hming a ziak lut. Italy international goalkeeper hian a chawr chhuahna Parma tan league match 168 a khelh bakah Juve tan match 432 a khel tawh bawk a ni.

Juve manager Massimiliano Allegri chuan, "Kan khelh dan ngaihtuah kha chuan 2-1 aia tama chak thei turah ka inngai. Ka nauten an khelṭha a, point thum hmuh phu zawk kan ni. Pjanic hian theihna sang tak a nei tih ka hria a, kan midfield khaikhawmtu leh player pawimawh a ni. Goal ropui leh chakna goal khungtu nih hi a tan a inhmeh hle," tiin chakna goal khungtu a fak.

Inter tan Icardi

Frank De Boer an ban hnuah Inter Milan-in manager nghet la ni lo mah se goal khung ah harsat lo. Crotone lakah Mauro Icardi-a goal hnih leh Ivan Perisic-a goal khat hmangin 3-0 in hnehna an chang a, point 17 hmuin league table-ah pakuana an ni.

Inkhel dangah league table-a pathumna AC Milan-in hmahruaitu Juve an thlahfal duh bik lo. Milan hian substitute Gianluca Lapadula leh Suso te goal hmangin Palermo 2-1 in an hneh. Milan hian point 25 hmuin table-ah pathumna an nih chhunzawm zel a, hmahruaitu Juve nen an inthlauhna chu point nga a ni chhunzawm zel.