Arsenal lakah goal nen Harry Kane a lo kir

Pathianni zan North London Derby-ah Harry Kane-a'n goal hmangin a dam tawh tih a lantir. England international hian Tottenham tan penalty chhuih lutin Arsenal nen 1-1 in an inhnehtawk.

Emirates Stadium-a inkhelah Mesut Ozil-a free kick pet chu Spurs defender Kevin Wimmer-a'n an lamah a tauh lut a, seond half ṭan tirhah Mousa Dembele penalty hlawhchhuah chu Kane-a'n an siphurh sut nan a pet goal.

Hun ṭha bawhpelh

Arsenal-in hnehna chang se league hmahruaitu nih theihna hun an nei. Arsene Wenger-a'n srtiker palian Olivier Giroud aiin Alexis Sanchez a ring zawk a, inkhel bulṭantu Chile international hian Alex Iwobi tan goal khung theihna turin duhthusama ṭha ball pe mah se Spurs keeper Hugo Lloris hmaah kum 20-a upa Iwobi a patuai hret.

Gunners tan Theo Walcott-a'n goal bar pet perin a hun ṭha neih a khawh ral a, ball lo kal let dawngtu Ozil-a'n hmanhmawh lut vangin goal ruakah a khung ṭhelh. Goal mamawh Wenger-a'n Giroud luhtir mah se season kal meka goal chhuah tlem ber Spurs (6) tlarhnung a su nghing zo lo a, Walcott thlaktu Alex Oxlade-Chamberlain lah game kaltluang ti khaihlaktu mai a ni.

Arsenal manager Wenger chuan, "Kan khelmuala inkhel kan nih avangin point hnih hloh kha result ṭha a ni lo. Tlarhnung aṭangin kan khel ṭha deuh vek a, kan khingpui goal hmaa kan che fuh thei lo kha a pawi a ni. Chutihrualin point thum hmu lo mah ila tuna kan awmna hi a la chhe hran lo," tiin a sawi.

Kane a lo kir

September 18 hnua a vawi khat nan Spurs tan Kane a lo kir a, an mamawh goal a pai tel nghal. Kerek hliam dam hlim Kane awm loh chhungin Spurs hian minute 903 khel hmanin goal 13 chiah an khung thei a, heng zinga goal nga chu EFL Cup-a Gillingham an hneh ṭumin a ni.

Kum 23-a upa Kane hi Gunners tlarhnung tan bauipui tham a tling a, Son Heung-min-a cross a tauh chu goal ban hrulah a kal hlauh. Ani bakah hian Christian Eriksen-a'n freekick aṭangin goal ban a pet per bakah a goal khung ngei tura nia lang chu Petr Cech-a'n a lo dan sak bawk.

Tottenham manager Mauricio Pochettino chuan, "Arsenal khan an khel ṭha a, keini lam pawhin goal khung turin hunṭha kan insiam ve bawk. Team pahnih inel tak inkhel a nih avangin a hmuhnawm hle. Kane a lo kir thei kha a lawmawm a, hun rei tak a inkhelh loh hnua ṭha taka a khel thei kha a lawmawm zual hle," a ti.

Arsenal leh Spurs inkhelh tawhna belhkhawmah goal 139 a lut tawh a, Premier League-a team pahnih intawn tawhnaa goal luh hnem berna a la ni. Pochettino hi Spurs manager zingah Arsenal a hmachhawn hmasa pangaa chak loh nei lo hmasa ber a ni, hei bakah hian tunah hian kum 1960-61 hnua a vawi khat nan an league match hmasa 11-ah tlawm an la nei lo.