Goal ruk nen a chung berah Liverpool

Liverpool-in Premier League nomawi chawi turin an ṭha tawk tih an pholang a, Pathianni zan khan an mikhual Watford chu 6-1 zeta sawpin table chung berah an invawrh chho - Jurgen Klopp a naute hian tun ang renga an khelh chuan season tawpah an awmna ngai hi an luah a nih pawn a mak lo ang.

Anfield-a inkhelah Liverpool tan Sadio Mane chuan goal hnih a khung a, Philippe Coutinho, Emre Can, Roberto Firmino leh Georginio Wijnaldum ten goal khat ṭheuh an thawh bawk. Watford tana Daryl Janmaat goal khung chu mualpho zualpui khuhna mai a ni.

Goal a sur

Minute 27-naah Liverpool-in corner aṭangin goal an khung nghal a, James Milner-a corner pet chu Mane chuan ṭha takin a tauh lut. Minute thum a liam hman chauh a, Kop ho hlim au thawm pawh a reh fel hmain Coutinho chuan yard 20 vela hla aṭangin goal hnihna a khung - Brazilian midfielder goal khung ṭhin dan pangngai a ni.

Chawlhlawk hman a nih hmain Can-a inlar ve leh a, German midfielder hian Adam Lallana ball cross ṭha tak tauh lut turin harsatna a nei lo. Second half-ah pawh Liverpool-in inkhel an thunun chhunzawm a, Lallana bawkin Firmino goal khung tur a siamsak a, Brazilian forward hian Mane goal hnihna tur a siamsak ve lehnghal bawk.

Liverpool tlarhnung ngaih-tuah-awm zia tihlan nan Janmaat-a'n goal khat khung ve zuai mah se injury time-ah substitute Wijnal-dum chuan Reds tana a goal hmasa ber a khung a, Liver-pool-in 6-1 in hnehna an chang.

Team hmuhnawm

Inrinni zanah hmahruaitu Manchester City leh Middles-brough an inhnehtawk a, Arsenal leh Tottenham inkhelah chak zawk an awm lo bawk. Liverpool-in hnehna an chang a nih chuan Everton laka 5-0 a hnehna chang hlim Chelsea lehpelin table chung ber an luah thei tih an hria a, zamna leh hlauthawnna rilru nena khelh aiin Klopp-a nauten nuam ti taka khelh an thlang zawk.

Reds tan tlarhmaah Coutinho, Lallana, Mane leh Firmino an taimak tluk zetin an hmuhnawm a, an ball inpe kual vel chu Watford tlarhnung tan lu haina tham a ni. Liverpool hian goal khung tumin Watford goal-ah vawi 28 zet an pet a, Reds tlarhmaten inrintawkna nen duhtawka ball an in pass kual paha an positioning fuh ṭhin tak karah Watford player-te an hawihai a ni ber.

Minute 20-a la awm tiha tlan luhtir Daniel Sturridge-a'n goal khung lo mah se English striker khelh danah Klopp-a'n sawisel tur a nei bik kher lo ang. England international hian tun season league match-ah goal la khung lo nachungin a thiam a la theihnghilh lo tih hmuh theihin a lang a, woodwork vawi hnih zet a pet per - Sturridge hian a ke veilam hmanga kawh zeta a pet chuan bar a per a, yard 20 vela aṭanga a shot Watford keeper Costel Pantilimon-a'n bar-a a lo nam per hman pawh pui tak a ni.

Klopp-a fimkhur

Liverpool manager Jurgen Klopp chuan, "Hetiang ang result duhawm kan neih chuan a phena thawhrimna tam tak a awm tel tih min hriatsak ka duh a ni. Result ropui tak a ni a, kan khel ṭha takzet bawk. Mahse, Everton sawptu Chelsea kha an khel ṭha a, Barcelona laka Manchester City an hmuhnawm a, Arsenal leh Tottenham sawi hmaih an harsa. Ṭha taka kan khelh zel hi a pawimawh chu a ni," tiin a elpui zingah Manchester United hming a lam ri lo.

Klopp chuan sawi chhun-zawmin, "Result a ṭhat chuan inrintawkna kan neih belh zel ang. International break vangin player-te kan chhuah a ngai a, kan hma lawka Southampton hmachhawn turin ṭha taka an rawn kir ka beisei. Tun dinhmunah chuan lawma phul hlutna tur engmah a la awm lo a, Liverpool kawr kan ha a nih chuan khelh ṭhat hi chu kan tih tur a ni," tiin table chung bera awm vanga phul hlut nan chuan a la hmaah a ngai.

Reds faktu Walter

Watford manager Walter Mazzarri chuan, "Liverpool hi team kan hmachhawn tawhah chuan an la ṭha ber. Tactical taka thlir pawhin an thiam a, an thawkrim a, player zingah hmasial taka khel an awm lo bawk. An rilru a huaisen a, team ropui tak an ni. Team-in a neih tur ang zawng zawng chu an nei kim vek a, hetiang renga an khel a nih chuan an champion em em ang," tiin an khingpui team a fak hle.

Italian manager chuan sawi chhunzawmin, "Liverpool khel-muala tlawm hi chu thil awm ve tak a ni a, mah se khati zata tlawm erawh ka naute an thiam lo ve bawk a ni. Kan tan chuan zanin hi zirlai ṭha tak a ni a, hei aia ṭha zawk hian kan lo kir leh ang," tiin tluk hlen a tum lo.

Inkhel chhehvel

Sadio Mane-a'n Anfield-a Premier League match nga a khelh tawhah goal nga a khung.

Philippe Coutinho-a'n a league match hnuhnung pasarihah goal thum khungin assist vawi nga a nei.

Roberto Firmino-a'n a league match hnuhnung pasarihah goal nga a khung a, assist vawi thum a nei.

Watford-in Liverpool laka goal ruk an chhuah kha an league match hnuhnung paruka an chhuah zat goal nga aiin a tam.

Adam Lallana-a'n assist vawi nga a nei tawh a, a aia nei hnem awmchhun chu Kevin de Bruyne (6) a ni.