Paris-ah number 1 Murray a champion

Nimina Association of Tennis Professionals (ATP) in world ranking an tih chhuah tharah Andy Murray chu a chung berah a awm. Britain tlangval hian Pathianni zan khan John Isner hnehin Paris Masters-ah a champion.

France khawpui Paris-a inkhelah Murray leh American star Isner te an in bei tawk hle a, darkar hnih leh minute 18 zet an inhmachhawn hunah world number 1 thar Murray hian 6-3, 6-7(4), 6-4 in hnehna a chang.

Kum 29-a upa Murray hian kumin chhungin ATP title paruk a lakna chiah a ni a, tournament hnuhnung ber ATP Finals khelh hmabak an la nei bawk. Tun season chhunga a champion tawhna zingah Wimbledon leh Rio Olympic-te chu a langsar zinga mi niin tennis a khelh hun chhungin nomawi 43 zet a chawi ta.

Murray chuan, "Final kan khelh hma khan ka zam hle. Ka chungah mipui mit a fuh ṭhup tih ka hria a, tun hmain khatiang khan inkhelh hmain ka la zam ngai lo," tiin final khelh hma boruak a sawi.

Paris Masters-ah hian Novak Djokovic chu Marin Cilic hneh lo-in quarterfinal-ah a tla. Final khelh hma hian Serbian tlangval hian Murray lakah chawlhkar 122 chhung zet number 1 a lo nih tawhna chu a hloh dawn tih a chiang tawh.

Kum 1973 aṭang khan ATP ranking hi computer hmangin mumal taka chhinchhiah a ni a, hemi hnuah Murray hi British mi zinga number 1 ni thei hmasa ber a ni.

Grand Slam vawi thum cham-pion tawh Murray chuan, "Ka team leh chhungkaw chungah lawmthu ka sawi, anni tel lo chuan he hmun hi ka thleng thei lo tih ka chiang. World number 1 ni tur chuan khawvel hmun hrang hrangah inkhel tura ka zin kual a ngai a, chumi ka tih theih nan chuan anni hian min pui ṭha hle a ni," a ti. Murray hian tun hma lama a thawhrim ang bawka thawhrim chhunzawm a tum thu a sawi tel bawk.

Kum 31-a upa Isner chuan lawmpuina thu sawiin, "Andy chawrkar tin deuhthaw kan inhmu a, i thawhrim zia ka hmuh pui che. Khawvela a ṭha ber nih hi i phu, zin kawng ngaihnawm leh ropui tak chu a ni e," tiin a elpui a fak.

A la tawp lo

Tennis season a la tawp lo a, Pathianni aṭang hian O2 Arena, London-ah ranking-a a sang pariat ten 2016 ATP World Tour Finals an khel dawn. Champion lai Djokovic tan kum tawp khar nana champion-na hun ṭha a nih dawn rualin Murray tan Australian leh French Open final-a a hneh loh laka phuba lakna hun ṭha a ni ang.

ATP Finals-ah hian Federer leh Nadal te chu hliam vangin an inlan dawn lo. Kum 2003 hnu lamah he inelnaah hian Federer leh Djokovic te champion zat belhkhawm chu vawi 11 zet a ni - tun hnai kum li chhung chu Grand Slam vawi 12 chawi tawh Djokovic a champion vek.

Murray chuan, "Ka tan chuan world number 1 ni chunga season khar tum hi duhthusam hmasa ber a ni a, chumi hnuah chuan Grand Slam nomawi dang chawi leh tum a ni. ATP Finals kan khelhna tur hi kan ram a ni a, engtiklai pawha min ṭantu leh hun harsa ka tawh lai pawha min phatsan ngai lotu fan-te hmaa inkhelh ka chak tawh hle," tiin a sawi.

Ngaihnawm

• Murray hi kum 1973 hnuah mipa player world number 1 ni thei 26-na chiah a ni.

• ATP ranking hi chawlhkar 52 chhunga tournament 18 an khelh aṭanga point lak ṭhin a ni.

• Kum 1974 khan khatih hun laia kum 30 leh ni 11-a upa John Newcombe chu world number 1 thar a lo ni tawh, ani hnuah chuan kum 29-a upa Murray hi number 1 ni leh thei upa ber a ni.

• World number 2 nih hnuah Murray hi a chung bera lawnkai tura nghak rei ber a ni. Roger Federer, Rafael Nadal leh Djokovic te hun laia chawr chhuak anih avangin world number 2 a nih tirh aṭanga kum sarih leh thla thum hnuah number 1 a ni chauh.