Chanmari striker thar Dodoz

Chanmari FC chuan an official facebook page-ah ‘Drogba leh Yaya te ram aṭangin Leonce Dodoz kan lalut e’ tiin chhuang takin an ziak.

Chanmari FC hi MPL5-ah pahnihna an ni mek a, semifinal lut chiang turin point tam an mamawh tawh lo. Lalsangzuala Hmar hoten Mohammedan SC aṭanga Ivorian forward Dodoz an hawh chhan chu champion a duh vang a ni.

Ivorian forward Dodoz hian Calcutta Football League (CFL) khelh zawh takah Mohammedan chu pahnihna nih puiin goal li a khung bakah assist vawi li a nei a, record thlirin foreigner vantlang chunglam niin a lang.

Kum 27-a upa striker Dodoz hian Ivory Coast football league sang ber club JC Abidjan tan a career a ṭan a, heta ṭang hian kum 2012 khan Nepal club Friends a zawm. Season khat hnuah Ivorian forward hian Nepal club tho Three Star Club chu zawm lehin a club thar hi a champion pui nghal a, kum 2014 khan Nepalese club Manang Marshyangdi Club zawm lehin Vietnamese V-League ah pawh tawnhriat a nei tawh bawk.

Dodoz hi I League second division-ah Gangtok Himalayan tan a inlan a, team top scorer niin a goal khung zingah Mohammedan lama goal thum a khung pawh a tel. Mohammedan hian a ṭhatzia hriain Ivorian forward hi an lalut a, Chanmari lamah pawh hian a ngheta chhuahtir phal loin an hawhtir (loan) chauh a ni.

MPL2 champion Chanmari hian an match hnuhnung bera Bethlehem VT an draw ṭumin an defender thar Ugochukwu Godswill (Ugo) chu minute 78-naah luhtirin Nigerian defender hian Lalmuanawma a thlak.

Chanmari FC coach Lalsang-zuala Hmar chuan, "Ugo hian inkhel bul a ṭan thei tawh turah chuan ka ngai a, Dodoz-a chungchang erawh ka sawi thei lo. Kan bulah vawi khat chiah training a la nei a, theihtawp a chhuah nghal avangin ka lawm hle a ni," tiin Vanglaini palai a hrilh.

Nimin khan Dodoz hian Lammuala Chanmari FC training a zawm tawh a; November 10, Ningani zana Chhinga Veng nen an inkhelh huna bul a ṭan leh ṭan loh chu coach Lalsangzuala Hmar thutluknaah a innghat tawh.