Bayern tlawm mah se an tlang

FIFA Club World Cup group stage-a an match hnuhnung berah Bayern Munich an tlawm a, Benfica chu 1-0 in an ngam lo - Portuguese club tan Andreas Schjelderup chuan inkhela goal awmchhun a khung a, German club-in a chhanletna tur an nei lo.

Bayern hian an match hmasa pahnihah hnehna an chan avangin last 16 an lut chiang tawh a, hei vang hian coach Vincent Kompany-a'n Boca Juniors laka 2-1 a chak team aṭangin player pasarih ngawt a siksawi.

Mahse, 1-0 a an hnufual hnuah Kompany-a'n chak duhin Harry Kane, Michael Olise leh Joshua Kimmich te second half-ah a luhtir a, an beisei goal erawh an thawk chhuak zo lo.

Germany international Kimmich hian si phurh sutna goal a khungah inngai mah se, offside vangin pawmsak a ni lo a, Galatasaray zawm mai tur Leroy Sane pawhin a chance neih a chhawr thei bik lo - a tawpah Bayern an tlawm a, Benfica-in group C hmahruaitu ni chungin last 16 an lut.

Hetihlai hian group C inkhel dangah Boca Juniors chuan rin loh takin Auckland City an hneh zo lo a, 1-1 in an inhnehtawk. New Zealand club Auckland goalkeeper Nathan Garrow chuan an lamah tilutin, Boca tan goal hmahruai a khung.

Mahse, Auckland tan Christian Gray chuan si phurh sutna goal a tauh lut a, CWC-a an goal awmchhun a khung - Gray hi semi-professional niin, inkhelh bakah school PE zirtirtu a ni bawk!