Vawi sarih champion tawh Lyon an tla!

Olympique Lyonnais chuan season tharah Ligue 1 an khel thei dawn lo - France rama football inelna sang berah hian vawi sarih lai an champion tawh a, mahse an sum dinhmun ṭha lo vangin Ligue 2 lamah an tlak a ngai ta a ni.

French professional football club te sum dinhmun endiktu - French football financial watchdog (DNCG) chuan nikum November khan Lyon hian sum dinhmun a ṭhat loh avangin tlahniam turin a lo ti lailawk tawh a, thutlukna tak erawh tun hnai khan siam a ni thung.

Tun kar tir khan Lyon thuneitu te leh club neitu John Textor te chuan DNGC te an hmu a, an sum dinhmun siamṭhat an tum dan leh hma an lakna hrang hrangte an sawipui a, mahse an rilru an hmin zo lo - Ligue 2 lamah an tlak a ngai dawn ta tho a ni.

Eagle Football Group hian Lyon-ah neitu nihna 77% an nei a, anni hian nikum October khan pound maktaduai 422 tehmeuh mai leiba an neih thu an lo puang tawh a, an sum dinhmun siamṭhat tum viau mah se an thei rih lo.

Lyon neitu Textor-a hi Crystal Palce neitu zinga mi a ni a, US sumdawng hausa hian Crystal Palace-a neitu a nihna 43% zet a hralh a, tun hnaia English club neitu a nihna a hralh hian Lyon pawh a nghawng nghal niin an sawi.

Lyon chuan thuchhuah siamin, "Olympique Lyonnais chuan DNCG thutlukna hi mak kan ti a, pawm thiam mai pawh harsa kan ti. A rang thei ang berin thuneitu sang lamah kan thlen ve ang.

"Tun hnaiah DNCG nen kan indawr nasa a, sum leh pai dinhmun siamṭhat dan tur leh a lo luh theihna tur kawng hrang hrang pawh kan sawi ho nasa bawk, a nihna takah chuan season hmasa aiin season thar lo awm tur atan hian sum hnar kan nei ṭha zawk niah kan ngai.

"A kum zawnin European Football khel thei dinhmun kan ding ve leh tawh a ni a, chutiang a nih mek laia hetiang thutlukna kan chunga a lang hi a pawi kan ti. Ligue 1 kan khelh zel theih nan Olympique Lyonnais chuan hma kan la dawn," an ti.

Ligue 1 club hlun tak Lyon hian an sum dinhmun tih ṭhat tumin theihtawp chuan hma an la. An player zinga hlawh tam ṭhenkhat an chhuah tir a, chung zingah chuan Alexandre Lacazette leh Anthony Lopes te pawh an tel.

Thlasik bazar lai khan Maxence Caqueret chu Serie A club Como hnenah an hralh a, tun hnai khan Rayan Cherki chu Manchester City hnenah an hralh bawk; an player pahnih hralhna aṭang hian pound maktaduai 45 an hmu thei bawk.

French club zingah Lyon aia Ligue 1 champion hnem hi team panga chiah an awm a, kum 2002 - 2008 chhung phei kha chuan France rama football inelna sang ber hi an thunun hneh hle; kum 2020 khan Champions League semifinal an lo thleng tawh bawk a, kum 1989 hnu lamah Ligue 2 an la khel leh ngai lo.

Ligue 2-ah an tlak takah chuan Reims chuan Ligue 1 an khelm chhunzawm thung ang, anni hian relegation playoff-ah Metz an ngam lo; clu dang chetbuaina chu an tan remchang a lo nih phah dawn a ni.

Lyon tan beisei a bo nghal vek tihna erawh a ni bik lo. Infiamna lama thubuai ngaihtuahtu sang ber Court of Arbitration for Sport hnenah an la zualko thei. CAS hian mimal leh club hremna tam tak chu a lo ngaihtuahsak tawh a, hremna tihnepsak pawh a lo nei tawh ṭhin bawk.