Lallana-a'n football a chawlhsan

England midfielder hlui Adam Lallana chuan inkhelh a chawlhsan ta. Three Lions tana match 34 kheltu hian season hmasa khan Southampton tan a khel a, hun tawp a hmanna a ni zui ta nghal bawk.

A vanglai chuan Lallana hi Liverpool tan a khel phak. Reds tan inelna hrang hrangah match 178 khelin goal 22 a khungsak a, Premier League, Champions League, UEFA Super Cup leh Club World Cup te a la vek a, a hlawhtling hle.

Lallana chuan, "Southampton hi ka bul ṭanna hmun a ni a, ka hun tawp hmanna hun a ni leh bawk hi ka lawmin a inhmeh ka ti hle, ka tan chuan engkim bul ṭanna hmun a ni," tiin a sawi.

Kum 18 mi chauh a nih laiin Lallana hian Saints aṭangin a football zinkawng a ṭan a, kum 2014 khan pound maktaduai 25-in Liverpool a zawm. Anfield-ah season ruk a hman hnuin Brighton a zawm a, chumi hnuah Saints lamah bawk a kir.

Lallana chuan, "Ka inkhelh hun chhunga ka hun hman dan te ka chhut kir a, inchhirna ka nei lo. Ka thlen chinah khan ka lawm em em a, hun nuam leh hlimawm a ni. Zinkawng hlimawm tak ka zawh theih nana min puitu zawng zawng chungah ka lawm," a ti.