Fiahna paltlangtu Paolini

Wimbledon inbuatsaihna zinga mi - Bad Homburg Open khelh laiah seeded pahnihna Jasmine Paolini chuan fiahna hautak a paltlang, inkhel inhnehtawk takah Leylah Fernandez chu 7-6(8) 7-6(6) in a hneh.

Set khatnaah Paolini hian 5-4 a nih laiin a khingpuiin set point a hmuh tawh chu a chhuhsak a, tie break khelh niin a tlang; set hnihnaah pawh an inchai tawk hle, match point vawi nga a hmuhna chu a hlawhtlin pui chauh a ni.

Italian nula Paolini chuan, "Grass-a inkhelh hi chu a nuam a, boruak a zângkhai hle bawk. Match hautak khelh hi chu a hahthlak, chutihrualin kan paltlang thei a nih chuan a hlu zual bik em em thung," tiin a sawi.

Inkhel dangah Iga Swiatek pawh a chak - Polish star hi a tir lamah khel ṭha tawk lo mah se, insiamṭha thuaiin a khingpui Victoria Azarenka chu 6-4, 6-4 in a hneh.

World number 1 hlui Swiatek hi set khatnaah 2-4 in a hniam hman. Mahse, a khingpui service a chhuhsak bakah ama service hum zuiin set a la a, set hnihnaah pawh a hunah tak che fuhin a chak zawkah a ṭang.