Verstappen tan fimkhur a ngai

Max Verstappen chu hremna na zawk hmachhawn thei dinhmunah a ding mek a, penalty point vawi khat a hmuh belh leh a nih chuan intlansiak vawi khat hmachhawn thei lo tura hrem a ni ang.

Red Bull driver hian nikum June aṭanga chhiarin penalty point vawi 11 a hmu tling tawh, intlansiak thei lo tura hremna tawng turin point khat hmuh belh a tawk, hmuh theih erawh thil châkawm loh leh ṭha lo a ni.

Dutch tlangval Verstappen hian, "Fimkhur ka ngai hle, chutihrualin min hremna ṭhankhat hi chu mak tih chang ka nei ṭhin," tiin a lo sawi tawh a, driver dang nena thil tih inangah hremna tuartu zawk a niah a inngai a ni.

June 29, Pathianni zan dar 6:30 hian Austrian Grand Prix an tlan leh dawn. Verstappen tan Red Bull Ring hi hmun ṭha bik a ni a, vawi nga hnehna chang tawhin chak tam ber a ni, kuminah pawh rinkai a ni leh dawn.

Season hmasa Austrian Grand Prix-ah pawh khan Verstappen hi sprint race aṭanga chak ṭanin a chungnung a, kuminah pawh team thuenitu lam chuan kum bul an ṭan fuh tawk lohna lai siamṭhat nan hman a tum ang.

Red Bull CEO Christian Horner chuan, "Tuna kan ṭhat tawk lohna lai ni a lang chu kawng kawi laia tlan muan deuh leh, chumi hnua chak taka tlan chhunzawm lai hi niin a lang a, a siamṭhat dan tur pawh kan ngaihtuah nasa hle.

"Ruahmanna kan nei a, kan ruahman dan hi tun kar tawpah pawh a fuh ngei ka beisei," tiin a sawi. Kar tawpa an tlanna tur Red Bull Ring hi an tan hmun ṭha a ni ṭhin bawk a, boruak neih len an tum hle a ni.