Mission Veng leh Manajit ten phuba an la

Hrangbana Memorial 2nd Mizoram Badminton League final lut turin Mission Veng-in league round-a an hneh loh Champhai chu 3-2 in an hneh. Nizan khan Saron Veng Jeremy's Smashers leh Tuikual Shuttlers ten semifinal hnuhnung zawk an khel a, result kan hre hman lo, final hi November 11, Zirtawpni zana khelh tur a ni.

Thawhlehni zan khan Electric Veng YMA Hall-ah tualchhung badminton hun pawimawh hman a ni a, Mizoram number 1 RK Manajit Singh leh number 2 Lal-muanawma ten hun tawp kharin ranking-a dinhmun sang zawk Manajit hmangin Mission Vengin hnehna an chang.

Game Plan

Champhaiin an intawn hmasak
ṭum ang thoin player an rem a, Mission Veng erawhin mixed doubles-ah player manto chhawr tawh loin doubles-ah RK Manajit Singh leh Abhishek Yeligar te an inkawptir tawh. Mizoram no. 1 leh Karnataka shuttler te inkawp hnuah Mission Vengin hnehna an chang vek.

Ponty chak nawn

Mixed doubles aṭangin semifinal ṭan a ni a, Siddharth Manoj Thakur leh Ponty Lalramtluangi te inkawp-in Johny Lalhlimpuia leh Hming-thiang-hlimi ṭangdun chu hneh nghalin Champhaiin 1-0 in hma an hruai. Zotlang nula Ponty hian MBL2-ah record
ṭha tak a nei a, Siddharth nena an inkawp
ṭumin an khingpui an hneh vek.

Abhishek 2 -0 Siddharth

Champhaiin mixed doubles zawhah singles an khel dawn tih hre reng chungin Siddharth an luh nawntir a, an intawn hmasak ṭum ang thoin Karantaka shuttler Abhishek Yeligar a chak nawn. BAI ranking-ah Maharashtra shuttler Siddharth chu 8-na niin Abhishek hi 34-na ni mah se Champhai player hian academy-a a awmpui hi a zuam sual tih a chiang hle.

Doubles-ah rinkai chak

Mipa doubles-ah Mission Vengin Abhi--shek Yeligar leh RK Manajit Singh te an inkawptir a, Champhai tana inlan Jerry Zodinthara leh Zodin-mawia te tan Abhishek leh Manajit te an ṭha lutuk hret.

35+ Men's doubles khelh chhunzawm niin Champhai tan Lalmuanawma leh Lalthlamuana te an inkawp a, an intawn hmasak ṭum ang bawkin Mission Veng aiawh Lalrindika Ralte leh Albert Lalnunhlima te chu an hneh nawn. Amaherawhchu an intawn hmasak ṭum aia an intluk tawk hret avangin nikuma Hlimen champion puitu Muanawma'n a tha a hmang hnem a, match tawp berah a nghawng a lang.

Men's leh 35+ doubles-ah match hmasa zawka chak ve ve an chak nawn a, match li khelh zawhah 2-2 a ni.

Mizoram no. 1 Manajit

Player lilamnaah Mizoram player manto ber chu Manajit a ni a, a khingpui Muanawma nen Rs 25,000 man a lei ve ve an ni. An intawn hmasak zawk ṭumin Muanawma'n 35+ doubles khelh zawhah Manajit hi a hneh hram a, semifinal-ah pawh hian a hahdam dawn lo tih hre reng chungin match pawimawh khel turin an dah.

Match pawimawh Manajit-a'n ṭan phat aṭanga a tawp thlengin a thunun a, Muanawma tan insiamremna hun a siam sak lo. Mission Vengin Mizoram number 1 lei nana sum an thehchhuah hnem chhan hun pawimawhah a lang a, Manajit-a'n tualchhung badminton-a a elpui ber Muanawma lakah phuba a la.

Mangṭha Champhai

Aizawl khaw pawn team awmchhun Champhaiin MBL2-ah bul ṭan ṭhain semifinal lut hmasa ber an ni a, inelna tawp lama an thutlukna siam fuh tawk loh an tuar. League match hnuhnung bera Saron Veng Jeremy's Smashers an hmachhawn ṭumin inelna an la thutak tawk lo a, an chak kaltluang tihtawp a nih ang bawkin league-ah hmahruaitu an nih loh phah bawk.

Semifinal match pawimawhah an khingpui milin player an rem lo a, singles khel thei turin BAI ranking-a 8-na Siddharath Manoj Thakur nei chungin Mission Veng lakah singles match pahnihah an chak lo ve ve. Champhaiin an beisei ang an thlen phak loh avangin an ui ang a, mipui lamin thui zawka an thlir erawh chuan team panga chiah awmna MBL-ah team ṭha ber zinga mi an ni pha a, an thlen chin hi an chhuang thung ang.

Semifinal : Mission Vengin Champhai 3 - 2 in an hneh

Category Champhai Shuttlers Mission Veng Game

XD Siddharth Manoj Thakur & Johny Lalhlimpuia & 15 - 7, 15 - 14

Ponty Lalramtluangi Hmingthianghlimi

MS Siddharth Manoj Thakur Abhishek Yeligar 11 - 15, 11 - 15

MD Jerry Zodinthara & Abhishek Yeligar & 5 - 15, 10 - 15

Zodinmawia RK Manajit Singh

35+ MD Lalmuanawma & Lalrindika Ralte & 15 - 12, 15 - 13

Lalthlamuana Albert Lalnunhlima

MS Lalmuanawma RK Manajit Singh 5 - 15, 6 - 15

Player of the Tie : RK Manajit Singh, Mission Veng