Sanchez A inhlam

Alexis Sanchez-a'n chawnah hliam a tuar. Arsenal forward hi Chile national team-ah koh ni mah se World Cup qualifier-a Colombia hmachhawn tura an inpuahchahna lamah hliam a tawh tak avangin Thawhlehni khan a inhnukdawk.

Chilean FA (ANFP) chuan an player pawimawh hian hliam tenau a tawrh thu an sawi rualin karleha Uruguay an hmachhawn hun-ah erawh an chhawr theih ngei an beisei thu an sawi thung. Thuchhuah siamin Chilean FA chuan, "Alexis hi Barranquilla-ah a zin ve dawn lo a, karleha inkhel pawi-mawh kan neih tura inlan thei turin Santiago-ah inenkawlna a lo nei ang," an ti.

Copa America champion Chile hian South America World Cup qualifying-ah beisei an phak rih lo a, match 10 an khelh tawh aṭanga point 16 hmuin table-ah pangana an ni mek - zanin dar 2:00-ah an chung chiaha awm Colombia an hmachhawn dawn a ni.

Kum 27-a upa Sanchez hi tun season-ah a khel ṭha tluang hle a, in-el-na hrang hrangah Arsenal tan match 15 a khelh aṭanga goal riat khung tawhin an player ṭangkai a ni mek. Gunners hi Premier League-ah palina ni mekin Inrinni zanah Man-chester United an hmachhawn dawn.