Wales player zingah Bale a thiam ber

Real Madrid forward Gareth Bale chu a vawi ruk nan Welsh Player of the Year-ah thlan a ni a, a zawna vawi li he chawi-mawina a dawnna a ni bawk. Stoke midfielder Joe Allen chuan award pa--hnih a hum haw a, Liverpool midfielder hlui hi Players' Player of the Year leh Fans' Player of the Year chawimawina pek a ni.

Kum 27-a upa Bale hian ram leh club tan season hmasaah khan hun duhawm tak a hmang a, a vawi hnih nan Real Madrid chu Champions League nomawi a chawi-pui bakah Wales chu Euro khelh zawh takah khan semifinal a luhpui bawk. Joe Allen-a'n club tan nomawi chawi loin season khar mah se Euro semifinal an luhna kawnga a thawhhlawk em avangin UEFA-in team of the tournament a thlanah khan a lang phak hial.

Football Association of Wales-in chawimawina an sem zanah hian Euro khelh zawh tak avang khan ṭum danga sem ngai loh award dang sem belh a ni a, Arsenal midfielder Aaron Ramsey chu Wales Player of the Tournament-ah thlan niin Belgium laka Hal Robson-Kanu goal ropui chu Welsh goal of the tournament-ah thlan a ni.