Chona hautak hmachhawn duh Wilshere

Jack Wilshere chuan hliam vanga hun rei tak chhung a inkhelh mumal theih loh avang khan football a ngainatna a tlakhniam hman thu a sawi chhuak.

Arsenal mid-fielder hian kum 2013 hnuah ringawt pawh a kephah leh ke rekah vawi 12 zet hliam a tawk tawh a, hei bakah hian a khup na vangin ṭum thum a inkhel thei lo tawh bawk. Season hmasa tawp lam khan rawn dam lehin loan hmangin Bournemouth a zawm.

Kum 24-a upa Wilshere chuan, "Premier League inkhel hautak tak takte ka ngai a, inkhel boruak sang taka team tana danglama thlentu nih leh ka chak. Khatiang hun kha tawn leh ka duh a, football ka ngainatna kha a tlahniam hman a, tunah hian a hma ang kha ni leh ṭan mek," tiin a sawi.

England international Wilshere hi kum 16 leh ni 256 chauha upa a nih laiin Gunners tan a inlan tawh a, club tana Premier League khel thei naupang ber a ni. Theihna sang tak nei ni mah se a vanduai theih em avangin a inlan tam lo - Emirates Stadium-ah a cham chhunzawm zel dawn em tih pawh a chiang ta rih lo a ni.

Wilshere chuan, "Tun dinhmuna ka thil tum ber chu ṭha taka season hman zawh phawt a ni. Arsenal-ah hian ka la cham chhunzawm thei a, hun rei tak ka hliam hnuah hian fans hnenah ka theihna tak pholan leh hi ka duh a ni," tiin a sawi.