Inter Milan coach thar Stefano Pioli

Serie A club Inter Milan chuan November 1-a an ban tak coach Frank de Boer thlak turin Lazio boss hlui Stefano Pioli an lalut a, kum 51-a upa Italian manager hian June 2018 thleng San Siro-a cham turin contract a ziak.

April thlaa Lazio-in an ban coach hna hi a hautak nghal dawn. A hna hmasa ber atan November 20 zan khian tun hnaia harhtharna chang, an hmelma kumhlun AC Milan nen league-ah Derby match an khel nghal dawn.

Pioli hian club 11 tehmeuh enkawl tawh mah se coaching lamah sulhnu chhuan tur a nei lo a, nomawi liantham chawi a la nei miah lo! A club enkawl zingah Lazio bakah Parma, Palermo leh Bologna te chu club langsar zual an ni.

Inter hian nipui transfer-ah sum tam tham tak an seng chungin manager thar Frank de Boer hnuaiah beisei an phak loh avangin ni 85 hnuah ban a ni a, tun dinhmunah Serie A-ah pakuana dinhmun luah mekin vawi 12 khelh tawhah vawi nga chiah hnehna changin vawi nga an tlawm bawk.