World Cup Qualifiers Brazil mikhual tur Argentina
World champion vawi nga ni tawh Brazil chuan Zir-tawpni zing dar 5:15 hian CONMEBOL 2018 World Cup qualifying khel turin Lionel Messi te ram Argentina an lo mikhual dawn a, inkhel thiam ram pahnihte inhmachhawn tur hi a hmuhnawm ang.
Tite-a Brazil
Brazil hian Dunga kaih-hruaina hnuaiah beisei phak lo mah se Tite an neih hnuah an hawikir tawh lo. Rio Olympic champion ram hian Tite kaihhruaina hnuaiah qualifiers match li an khelh aṭangin hneh-na an chang vek a, point 21 hmuin table-ah hmahruaitu an ni.
Anmahni ram ngeia Olym-pic gold medal an dawn hnuah Neymar-a'n, "Tunah chuan champion tak tak ka ni ta," a ti. Barcelona star hian a club tan nomawi tam tak chawi tawh mah se an ram tana hlawhtlinna chu a dah sang fal hle - hei hian an ram tana World Cup chawi a chak zia a tilang. Brazil tan match 73 a khelh aṭanga goal 49 khung thei Neymar hi Argentina lakah pawh Tite-a team hmachhuan a ni leh dawn.
Kum 55-a upa Tite enkawl Brazil hian World Cup Quali-fiers-ah hian match 10 an khelh aṭangin goal 23 an khung thei a, an an elpui ram 10 zingah anni aia goal khung hnem an awm lo. An lamah goal kua chiah lutin Argentina nen an inang a, anni aia goal chhuah tlem chu Uruguay (7) chiah an ni - an sulhnu thlirin tun dinhmunah chuan eng ram mah an huphurh rih lo tawh ang.
Brazil defender Dani Alves chuan, "Football-ah chuan hlauh kan nei thiang lo a, chuvangin kan hmachhawn tur hi Lionel Messi pawh nise kan hlau lo. Team dang ngaihtuah vak ai chuan keimahni hian engtiangin nge hma kan sawn zel theih ang tih a pawimawh zawk a, kan result ṭha hi neih chhunzawm zel a pawimawh," tiin Catalan club tana a lo khelhpui tawh Messi an hlauh loh thu a sawi.
Beiseina Messi
A zawna Copa America final-a an chak loh hnuah Messi-a'n ram tana inkhelh a chawlhsan thu a puang a, chawlh a duh chhan hi hlawhtlinna an chan theih loh bakah Argentina ram chhung football inrelbawlna fel tawk lo vanga ngaih a ni.
Argentina FA chuan Mauri-cio Pochettino, Diego Simeone leh Jorge Sampaoli te hming an lamrik hnuah Edgardo Bauza chu coach atan an ruat. Kum 58-a upa Bouza hian a hna hma-sa atan Messi a ko kir a, a tisual lo. Barcelona star hian a lo kirlehna hmasa berah Uruguay lakah goal khungin 1-0 in hnehna a chanpui nghal.
Ram tana goal khung hnem ber Messi awm loh hlanin Sergio Aguero, Gonzalo Higuain, Angel di Maria leh Javier Mascherano te khelhna Argentina-in chak ni hmel an hmu thei lo a, an match hnuhnung paliah chak an nei lo. Venezuela leh Peru te an inhnehtawkpui hnuah an mahni mualah ngei Paraguay an ngam lo - point 16 hmuin table-ah parukna an ni mek a, point an mamawh hle.
Intawn tawhna
Football ram ropui pahnihte hi tun hmain vawi 98 an lo in-----khel tawh a, ṭum 36 ve ve hneh--na changin vawi 24 chu an inhnehtawk thung; an sulhnu en chuan an intiat tawk hle. An inhmachhawn hmasak ber chu September, 1914 kha niin Buenos Aires-ah Argentina 3-0 in an chak a, an intawn hnuhnung ber Novem-ber 13, 2015 khan 1-1 in an inhnehtawk. An inhneh chian ber ṭum chu March 5, 1940 kha niin Argentina 6-1 in an chak.