Pedrosa a dam

Pathianni hian tun season-a MotoGP intlansiak hnuhnung ber atan Spanish Grand Prix tlan a ni dawn a, Japanese GP an tlan dawn ṭuma inhliam Dani Pedrosa chuan inlan theih ngei a tum thu a sawi chhuak.

Repsol Honda rider hi October thla a tlan zawh tak Japanese Grand Prix inbuatsaihna lamah a ke a hliam a, intlansiak pathum a hmachhawn theih loh hnuah beisei aia hmain a lo kir thei dawn. Pedrosa hian tun season-ah vawi khat chiah hnehna a la chang a, a pumpuiah parukna ni mekin a teammate Marc Marquez chu a champion chiang tawh.

MotoGP championship-a vawi thum pahnihna ni tawh Pedrosa chuan, "Ka dinhmun dik tak hi sawi chian theih fak ni rih lo mah se, bike ka khalh leh theih tawh avangin ka hlim hle. Intlansiak hnuhnung berah ka inlan theih ngei ka beisei," tiin a sawi.

Pedrosa chuan sawi chhunzawmin, "Ka tan chuan chawlhkar thum rei tak a ni tawh a, a chhan chu ka nuam tihna ber hmuna ka inlan theih loh vang a ni. Ka hliam zai a nih hlim kha chuan ka lungngai hman hle a, tunah erawh beisei aia ka dam chak avangin ka hlim hle," a ti.

Spanish rider Pedrosa hian kum 2006 aṭang khan MotoGP bike khalh ṭanin vawi 29 hnehna a chang tawh a, ṭum 103 chu podium-ah lawn tawhin a point hmuh tawh zawng zawng chu 2643 a ni.