Shaw leh Smalling chhantu Southgate

England manager lailawk Gareth Southgate chuan tun hnaia Manchester United manager Jose Mourinho-a'n team tan inpe tawk lo nia a sawi English defender pahnih Chris Smalling leh Luke Shaw a chhan.

Manchester United hian Pathianni zan khan Swansea chu Premier League-ah 3-1 in an hneh a, hliam vangin Smalling leh Luke Shaw te hi an inlan thei lo. An inkhelh hma hian Mourinho chuan, "Smalling hian na a neih avangin 100%-in a khelh theih loh tur thu a sawi a, Shaw chuan tukin zing khan a inkhelh theih loh tur thu min hrilh bawk. Player ṭhenkhat chu huaisen takin eng dinhmunah pawh ding se an khel mai zel a,
ṭhenkhat erawh na tenau vangin an chawlh der a ngai ṭhin," tiin a player pahnih hi a sawisel.

Mahse, England-in World Cup qualifier Scotland nena an khelh tur leh friendly match-a Spain an hmachhawn hun atana Smalling leh Shaw ko lotu Southgate chuan, "Player pahnih hi inkhel turin an dam ṭha tawk lo. Luke hi ka hrechiang a, a hliam hi a na hle. Pawn lam aṭanga engmah hrechiang loa thutlukna siam mai hi thil awlsam tak a ni," tiin a player pahnihte hliam chu inkhelhpui chi a nih loh thu sawiin club lama an boss sawiselna lakah a chhan.