Goa chak loh zanah Zico a inhrosa!
Thawhlehni zan Indian Super League inkhelah Kerala Blasters-in injury time-a CK Vineeth goal khung hmangin an mikhual FC Goa chu 2-1 in an hneh a, Goan club enkawltu Zico lung a awi lo hle.
Kochi khawpuia inkhel entu mipui 34,000 pungkhawm hmaah Rafael Coelho-a'n minute 9-na lekah Goa tan goal hmahruai khung mah se Kerala-in minute 46-naah penalty an chawi a, Mohammed Rafique shot a kuta lo khawihtu Gregory Arnolin chu red card pek niin Kervens Belfort chuan an si phurh sut nan a hmang bawk.
FC Goa an tluang lo laklawh a, minute 81-naah Richarlyson chu Bengaluru aṭanga Kerala pantu CK Vineeth lakah a foul avangin a yellow card pahnihna chawitir niin hnawhchhuah a ni bawk a, injury time-ah Vineeth hian chakna goal a khung chhunzawm bawk avangin Goa tan lungawina tur a awm lo.
Brazilian legend Zico chuan, "Vanduai vanga chak lo kan ni lo a, zanina kan thil hmuh kha chu thil zahthlak tawp khawk a ni. Player-te hi rim takin kartluanin an thawk a, khelmualah theihtawp an chhuah bawk. Mahse ISL hian enge an tih ve? New Zealand
aṭangin referee an chah chhuak a, New Zealander hian football leh ISL chungchangah enge hriat an neih ve? Brazilian referee ka hmuh ten zanin inkhel anga thutlukna dik lo hulhual an siam ka hmu ve lo a, referee ṭah tak in duh chuan football ram lian Spain leh Italy aṭang tein chah ta che u," tiin an chunga referee thutluknaah a lungawi lo hle.
A vanglaia 'The White Pele' tih hminglem an pek Zico chuan, "Season hmasa khan game kaihhruai dan pawh hre lo Japanese referee vangin final-ah nomawi ka chawi loh phah tawh a, Kerala khan hnehna chang turin engmah an tih ve a ngai lo a ni ber. Goa an rawn kalin football pangngai kan khel a, hnehna an chang a, an khelmuala kan kal ve hunah hetiang thil hi a thleng ta si a, a professional lo takzet a ni," a ti.
Brazil tan vawi 71 inlana goal 48 khung thei Zico chuan sawi chhunzawmin, "Kum 50 chuang football-a hun ka hman tawhah hetianga thil dik lo hi ka la hmachhawn ngai lo. Fan-te chuan thil thleng kha a tak tak vek emaw an ti a, a ni si lo. Theihtawpin kan bei let a, mah se engkim mai kha ruat lawk ang vek a nih avangin kan tan chuan a harsa a ni. Chakna goal khung lo se chu tun thleng hian kan la inkhel ang," a ti! Vineeth -a'n Blasters tan chakna goal a khung khan injury time-ah minute kua hun an hmang tawh!