Chhinga Veng hmaah Chanmari mi thar Dodoz
Mohammedan SC striker Leonce Dodoz chu zanin dar 7:00 hian Chanmari FC jersey hain Lammualah a inlan dawn a, Chhinga Veng hmaah fiahin a awm dawn.
Mizoram Premier League Sea-son 2 champion Chanmari hian point thum an hmuh chuan Round 11 zawhah chuan semifinal an lut chiangah a ngaih theih ang a, MPL kaithar erawhin point an hmu lo a nih chuan semifinal thlir loin relegation battle-ah an insawrbing a ṭul tawh ang.
Goal li vannei
Chanmari FC-in September thla khan Chhinga Veng hi 4-1 in an hneh a, an goal khung zat tam mah se MPL kaithar keeper chetsual vanga goal khung an nih miau avangin a score ang ngawt a ni lo. Chutihrualin Chhinga Veng nena khaikhin chuan team ṭha zawk an nih zia a lang chho a, match 10 khelh zawha an inthlauhna chu point 10 a ni.
Dodoz leh Ugo
Chhinga Veng hmachhawn turin Chanmari FC foreigner pahnih Dodoz leh Ugochukwu Godswill te chhawr theih turin an awm tawh a, an inlan leh lan loh chu coach Lalsangzuala Hmar thuneihna a ni.
Chanmari FC coach Sanga chuan, "Kan inkhelh hmasak zawka kan goal khung dan te, goalkeeper chetsual chungchang te, kan chakna zatte hi a pawimawh tawh lo. Tunah chuan chak hrim hrim kan mamawh a, semifinal thlen kan duh," tiin Vanglaini palai a hrilh a, bul ṭan tur chungchangah thutlukna a la siam fel loh thu a sawi bawk.
Emma an kawl
Chanmari FC-in Kolkata club
ṭha Mohammedan aṭanga loan-a Dodoz an hawh avangin Chhinga Veng hi zam tur an ni lo a, MPL kaithar hian MPL3 best defender Emma Chigozie an kawl.
Nigerian defender Emma hian Ramhlun North forward Oneyeama Francis lakah a theihna a pholang tawh a, Dodoz leh goal ruk khung tawh striker Malsawmfela lakah fiah-na hau tak zawk a hmachhawn ang.
Chhinga Veng coach Chawng-thansanga chuan, "Foreigner pawh hi nei lo mah se Chanmari FC hian player an nei ṭha tawh hrim hrim a, foreigner pahnih hi an ṭhatpui turah ngai mah ila kan hlauh phah lo. Dawngtea leh MK-a te khelh
ṭhat lai a ni a, Chanmari tlarhnung tan buai pui tham a ni ang," tiin Dodoz leh Ugo a huphurh bik lo.
An inkhelh tawhna sawi zuiin Chawnga chuan, "Ka enkawl hma a ni a, kha inkhel kha ka hmuh dan chuan Chhinga Veng kha kan vanduai a ni. Goalkeeper pahnih chetsual vanga chak lo kan ni a, chutih rualin thla khat chuang a liam tawh avangin Chanmari nena kan intawn tawhna kha chuan awmzia a awm lo," tiin a sawi.
Referee chungchang
Chhinga Vengin table hnuai lama an awm chhanah referee an mawhpuh a, thutlukna dik an chungah lekkawh chu ni se semifinal khel pha thei tur zingah an awm theih tur thu a sawi.
Chawnga chuan, "Round 6-ah penalty pek kan ni lo a, hun tawpa goal vangin BVT kan hneh lo. Champhaiah penalty pek kan nih loh laiin Ramlun North erawh penalty min pek lohna angah pek an ni a, hun tawpa referee thutlukna dik loh vangin kan hneh loh phah bawk. Lammuala Ramhlun North kan hmachhawn leh ṭum pawhin referee-in penalty a pe leh a, point thum kan hmuh loh phah. Match official hi chuan point kua hi chu min chhuhsak tawhah kan ngai a, hemi kawngah hian MFA pawhin ṭan a lak a ṭul a ni," tiin Vanglaini palai a hrilh.
Table-a pasarihna ni mek team enkawltu Chhinga Veng boss hian sawi zelin, "Kan la hnual lo. Kan main sponsor National Health Mission bakah co sponsor JSJ Fitpro leh Pran te pawh kan hnungah an la ding zel a, Chanmari kan hmachhawn hunah pawh hian ṭum dang ang thoin mipui ṭawiawmna ṭha tak kan neih ngei ka beisei bawk," tiin theihtawp an la chhuah zel tur thu a sawi.