Hmahruaitu BVT-in chak an la tum

Bethlehem Vengthlang FC-in point 20 hmuin Mizoram Premier League Season 5-ah hmahruaitu an ni a, point erawh an duh belh zel.

BVT boss Lalbiaksanga Colney chuan, "Point thum hmu turin kan khel dawn," tiin vawiin tlai dar 3:00-a an hmachhawn tur Ramhlun North hneh an tum tur thu a sawi.

BVT hian phase 1-ah Chan-mari FC chiah an hneh lo a, phase 2-ah squad tichakin MPL2 champion hi an draw tawh. An match hnuhnung berah BVT-in player thar Lalnunmawia hmangin hun rei zawk hma an hruai a, point khat hmu ve veah Chanmari FC chu vannei zawka ngaih theih an ni.

MPL5 hmahruai mektu BVT ang thoin Ramhlun North-in an squad an tichak ve tho a, Chanmari aṭanga an lakluh Isaac Lalruatpuia'n a club thar tana a match hmasa berah goal a khung nghal. Lunglei tlangval Isaac ang thoin Nigerian striker Oneyeama Francis-a'n a match hmasa berah goal a khung bawk.

Ramhlun North aṭanga en bik hlawh tur chu Francis a bawk a ni dawn a, ball semtu Zo-sangliana (Chhaia) hi team tan a la ṭangkai reng bawk.

MPL kaithar boss Lalruat-liana Sailo chuan, "BVT hi chu an dinhmun a ṭhat tawh avangin zalen takin an khel thei a, keini erawh kan chak chuan semifinal beisei thei mah ila kan chak loh erawh chuan relegate thei kan la ni. Hei vang hian chak tuma kan khelh a ṭul ang bawkin kan tlarhnung lam pawh kan rem fimkhur a ṭul ang," tiin Vanglaini palai a hrilh.

MPL5-ah round li chiah khelh tur a awm tawh a, match zawng zawng a pawimawh vek tawh. BVT-in Chanmari an hmachhawn ṭumin ṭantu an neih ṭhatzia an lantir a, Ramhlun North lamin Chhinga Veng an hmachhawn
ṭumin MPL hmahruai mektu
ṭantute hi tluk pha lo mah se vawiin tlaiah erawh point mamawh zawk an nih avangin khelmual pawnah pawh an tam hneh a ṭul ang.