A chung berah Sinner leh Sabalenka

Wimbledon 2025 boruak a lian chho zel a, mipa leh hmeichhe seeding a chhuak - mipa leh hmeichhia, a chung berah Jannik Sinner leh Aryna Sabalenka te an awm a ni.

June 30 aṭanga July 13 chhungin All England Lawn Tennis leh Croquet Club-ah Wimbledon hi an khel dawn a, tunkar chhung hian grass court inelna lian bera inlan thei tur chin qualifying chu khelh zawh a ni ang.

Mipa champion lai Carlos Alcaraz chu seeded pahnihna a ni a, a chunga awm Sinner hian final hma chuan an inhmachhawn thei lo ang - player ṭha pahnih hi French Open khelh zawh takah pawh khan final-ah an intawng, inkhel hmuhnawm bik an chhawp chhuak a ni.

Wimbledon seeding hi mipa leh hmeichhe world ranking chhuak thar ber mila siam a ni a, vawi sarih champion tawh Novak Djokovic chu a ranking a hniam avangin seeded parukna a ni, semifinal hma pawhin player ṭha zinga mi a hmachhawn thei dawn.

Hmeichhe singles champion lai Barbora Krejcikova chu seeded 17-na a ni a, ranking mila siam a nih miau avangin duhsak ngawt theih bik a ni lo. Wimbledon hian tun hma chuan ranking mil vek lo deuha siam chang an nei, kuminah erawh ranking an dah pawimawh ta hle.