Ederson-a'n khaw dang a hawi lo

Goalkeeper Ederson chuan Manchester City chhuahsan tumna a nei lo a, chhuak tur anga thuthang awm chu a dik lo tih a sawi chiang nghal bawk a ni.

Kum 31 mi Ederson hian Benfica aṭangin 2017 khan Man City hi a zawm. Nipui bazar hmasa khan Saudi Arabia lam pan tur angin thu a thang a, tun hnaiah Etihad Stadium chhuahsan tur angin thawm a awm leh bawk.

Brazil international Ederson chuan, "Nikum kha chuan hlawh tam tak nei tura sawmna chu ka dawng ngei mai, hlawh pawh tam uchuak tak a ni. Mahse, ka hma hun erawh Etihad Stadium-ah a awm thung.

"Ka ṭhiante hian chanchin thar tam tak min lo thawn ṭhin a, ka chhuak dawn anga ziahna thu a ni hlawm. Mahse, ka chungchang thu thar an ziah zinga 99% zet hi chu thu dik lo a ni hial ang," tiin a sawi.

Ederson hi khawvela goalkeeper ṭha berte zinga mi a ni a, tun hnaia Manchester City an hlawhtlin theih nan pawh a thawh hlawk hle. Man City tan hian Premier League nomawi paruk, FA Cup pahnih leh Champions League nomawi te a chawisak tawh a ni.

Hetih lai hian Porto goalkeeper Diogo Costa chu Manchester City nen sawi zawm mek a ni ve bawk. Pep Guardiola-a'n team din thar leh a tum mek a, keeper Costa hi lei chhuak tur chuan pound maktaduai 64 hman a ngai dawn.

Guardiola chuan, "Kan zingah Ederson a awm, ṭha takin training pawh a nei. Team tan sulhnu ropui tak tak a hnutchhiah, mahse a hma hun erawh ka hre bik lo," tiin tun hnai khan a lo sawi ve tawh bawk a ni.