Raducanu a chak lo

Wimbledon khelh hmaa tournament hnuhnung berah Emma Raducanu a chak lo. British star hi Eastbourne International-ah a inlan a, tleirawl Maya Joint lakah 4-6, 6-1, 7-6 (7/4) a chak loin second round-ah a zinkawng a tawp.

Kar hmasa khan Raducanu hi a hnungzâng na vangin a inkhel thei lo, Berlin Open aṭangin a inhnukdawk. Tunah inkhel thei leh tawh mah se result ṭha tak neih a harsat rih a, a inkhel thei ta erawh lawmna tur a ni ang.

Kum 22 mi Raducanu chuan, "A vawi li nan Wimbledon khelh ka tum a ni a, ka inbuatsaihna hi duhthusam ang thlap chu a ni lo mai thei; ka takasa dinhmun erawh a lawmawm lam a ni thung," a ti.

US Open champion hlui a ni a, inelna dangah erawh ropui taka chet a la nei lo. Wimbledon hi anmahni rama khelh tur a nih avangin ṭantu a nei ṭha leh dawn, boruak siam pawh a tum ang.