Elliott-a'n England final a thlenpui

England Under 21 chuan Euro Under 21 C'ship final lut turin June 25, Nilaini zan khan Netherlands U21 2-1 in an hneh a, Liverpool midfielder Harvey Elliot-a'n goal hnih a khung. Semifinal hnuhnung zawkah Germany U21-in France U21 3-0 in an hneh a, final hi June 28, Inrinni zan dar 12:30-ah khelh a ni ang.

Inelna hi Slovakia-ah khelh a ni a, England hi champion lai an ni. Group stage-ah England hian Germany hi 2-1 in hneh lo mah se final an thleng tho a, nomawi chawi nawn turin phuba an lak a ṭul dawn.

England-in kum 2023-a nomawi an chawi ṭum khan Elliot hi player pawimawh a ni. Tun ṭumah pawh hian goal li khung tawhin England player pawimawh ber a ni a, mahse Liverpool-a a hmalam hun a chiang lo. Season hman zawh takah khan Reds an champion a, Elliot hian league match vawi hnihah chiah inkhel bul a ṭan a ni.