UEFA-in league khelh zawh hram a duh

Coronavirus vangin football league hrang hrang te chu khelh zawh theih lohin an chawl mek a, UEFA chuan an duh ber chu league khelh zawh hram ni mah se khel zo thei lo an awm pawha an pawm tho tur thu an sawi tel. 

UEFA hian thlatir lam khan thuchhuah siamin European league-te chu inkhel zo loa an league tihtawp a nih chuan UEFA hnuaia inelna an hmachhawn turah season thar atan harsatna a awm theih tur thu an hrilh. 

Mahse, Ningania an thuchhuakah erawh UEFA pawh an nem ve ta a, league chu khelh zawh theih a nih loh pawhin tualchhung league-te chu Europe inelnaa inlan turte fel taka duang mai turin an hrilh tel a ni. 

UEFA chuan an duh ber chu league khelh zawh hram a nih thu an sawi tawh a, an hnuaia ramte pawh hemi hawi zawnga kawng dap hmasa phawt turin an hrilh. 

European football thuneitu chuan, "UEFA chuan national association leh league-te chu tualchhung inelna an kalpui mek zawh hram theih dan tur ngaihtuah turin a duh a ni. 

"Tualchhung inelna khelh zawh hram hian season thar UEFA inelna hmachhawn turah buaina awm loin awlsam takin engkim a chingfel thei dawn a ni," an ti a, hetihrual hian an khel zo thei lo a nih pawhin UEFA chuan kawng a dap dawn. 

UEFA chuan, "Kan beisei anga thil kalpui theih a nih loh chuan kawng dang dap chunga, season thara UEFA inelna hmachhawn tur zawn mai pawh a ngai ang," an ti. 

UEFA hian an hnuaia national association leh league-te chu kalphung dang hman phalsak mah se an rawtna chu UEFA-in a pawm kher loh tur thu an sawi a, engkim chu lang tlang leh dik taka kalpui an duh. 

European football thuneitu chuan, "Inthliarna, en hranna leh induhsakna ang chi lantir nan hman tur a ni lo a, lang tlang leh dik taka engkim kalpui tur a ni," an ti a, league thutluknaah mipui an lungawi lo a nih chuan UEFA inelnaa inlan tura team thlan chu an hnawl tur thu an sawi. 

Spanish Football Association chuan season thara UEFA hnuaia inelna Champions League leh Europa League-a inlan tur chu UEFA club coefficient ranking hmanga thlan mai an rawt a, club tam tak tan thu hriat nuam a ni lo. 

Rawtna ang hian kaltlang dawn se La Liga top four pawna awm Atletico Madrid chu Real Sociedad aia Champions League khel tur an ni dawn a, Premier League lamah chuan Leicester City aiah Manchester United-in Champions League an khel dawn tihna a ni thung!

European football-a ram leh ram inelna sang ber Euro 2020 chu Covid-19 vang hian nakkum atan sawn a ni a, a hming erawh Euro 2021 ni loin Euro 2020 tih tho tur a ni thung. 

UEFA chuan, "Euro 2020 hi European Championships (1960 - 2020) kum 60 tlin lawmna nen hman kawp tur a ni a, hetiang a nih avang hian a hming thlak loin Euro 2020 tih tho tur a ni dawn a ni," an ti. 

Hei mai hi a ni lo - Euro 2020 hming chuanna ngeiin thil tam tak buaipui a lo ni tawh a, 2021 a nih avangin a hming thlak ngai ta se sum sen tawhna tam tak chu a thlawn a chang thei. 

UEFA chuan hming thlak kher hi ṭul loa sum hlohnaah a ngai tel bawk a, nakkumah khel dawn mah se European football championships chu Euro 2020 tiin hriat a ni dawn ta tho a ni.

*La Liga chuan June-ah league ṭan leh theih an inbeisei

*May thla tawp emaw June thlatirah Serie A chu khelh leh theih an beisei

*Ligue 1 chu June 17-a khelh ṭan leh turin ruahmanna kalpui mek a ni

*Bundesliga chu May 9 khian khelh ṭan tum a ni 

*Premier League-in inkhelh ṭan leh hun tur an sawi thei lo