Dortmund tan goal khat a tawk

Borussia Dortmund-in Club World Cup-ah harsatna nei loin last 16 an lut a, German club hian Nilaini zan khan Ulsan HD chu 1-0 a hnehin, Daniel Svensson chuan inkhela goal awmchhun a khung.

German club-in bul an ṭan ṭha a, mahse, Jobe Bellingham, Felix Nmecha leh Karim Adeyemi ten goal an khung thei lo. Minute 36-naah Svensson-a'n a khung ta nge nge a, 1-0 a ni.

Ulsan goalkeeper Hyeon-Woo Jo chet ṭhat zan a ni a, South Korean club an mualpho lo zawk - Serhou Guirassy khung ngei tura lang a dante chu pui tak a ni!

Pascal Gross leh Yan Couto ten an chance neih an chhawr lo zui a, 1-0 in Dortmund an chak hram. South Korean club hian chance nei lo tawp an ni bik lo a, Lee Jin-hyun-a khung ngei tur nia lang chu Dortmund keeper Gregor Kobel chuan a dansak.

Dortmund coach Niko Kovac chuan, "Korean team khan goalkeeper ṭha tak an nei a, chuvang chuan goal khat chauh kan khung a ni," a ti.

Group F inkhel dangah Mamelodi Sundowns leh Fluminense te 0-0 in an inhnehtawk a, group hmahruaitu Dortmund hnung zuiin, Fluminense-in last 16 an lut.