Bundesliga club an inpeih leh ta!

Bundesliga  bakah a hnuai lama inelna dangte hi March thlatir aṭang khan chawlh lailawk a ni tawh, league thuneitu leh club lamin khelh duh tawh mah se sorkar thu an ngaihchan tel a ngai - hri leng buaina hian football chauh ni loin thil dang zawng zawng a nghawng tel vang a ni.

Ningani khan German Football League (Deutsche Futball Liga - DFL) chuan video conference hmangin Bundesliga club bakah division hniam zawka mite nen an vaiin professional club 36 a inhmukhawm pui a, entu nei loa khelh chhunzawm phawt an duh.

DFL chief executive Christian Seifert chuan, "May 9-a inkhel ṭan leh turin kan inpeih, a aia tlai zawkah kan ṭan dawn a nih pawhin kan inpeih tho. Keini lam inpeih mah ila kan thua kaltlangpui ngawt a fuh lo.

"Sorkar thutlukna kan ngaihchan a ngai, entu awm loa league khelh hi kan duh dan a ni lo. Amaherawhchu, tun dinhmunah chuan duhthlan tur dang kan nei chuang lo. Eng anga chona hautak leh khirhkhan nge kan hmabak erawh kan hre bik lo," a ti.

German sorkar a fimkhur a, an rama hri a darh zual hmain endikna a kalpui nasa. Hri kai hmuh chhuah tam mah se ram dang aiin thihpui an tlem deuha ngaih a ni a, tun hnaiah phei chuan hri kar thar an tlahniam viau bawk.

Mahse, sorkar thuneitu lam an la thlamuang rih lo. An thu chhuah thar berah chuan October 24 thleng mipui vantlang punkhawmna lam chi chu tih rih loh tur a ni. Hetiang a nih chuan season thar tir lamah pawh entu an awm thei dawn lo tihna a ni.

Sorkar hian an duh chuan DFL leh club rawtna leh thil duhte hi an hnawl vek thei. Mahse football khelh lo reng hian nghawng lian tak a nei tih hrechiangtu an ni a, sorkar thuneitu zingah entu nei loa league khelh chhunzawm duh pawl an awm, thutlukna erawh an la siam lo.

Inkhel entu awm lo mah se football match a awm dawn chuan mihring che vel an tam a ngai dawn. Player, coaching staff, medics, referee, ball boys leh ball girls, ground staff, technician, safety officer leh TV production staff bakah VAR buaipuitute an awm a ngai.

DFL chuan hriselna leh himna kawnga hma la turin 'Task Force' a din. Anni ruahman dan chuan stadium chhunga lutte chu hlawm thumah an ṭhen hrang ang a, inkhel pakhat buaipui turin a tam berah mi 100 aia tam an awm tur a ni lo.

Player 22 chu hlawm khatah an awm ang, bench a ṭhu player 18 chu hlawm hranah an awm leh ang a, referee panga leh hna thawktu dang chu hlawm khatah an awm ve leh thung dawn a ni.

Martin Luther University-a biochemist Alexander Kekule chuan, "Training lai leh inkhelh dawnah player zawng zawng endik vek an ni ang, a tlem berah DFL hian test vawi 20,000 chuang a kalpui a ngai ṭhin dawn tihna a ni," tiin league round khat khelh pawh a hautak thu a sawi ve bawk.

Tun dinhmunah chuan Germany ramah hian chawlhkar tin mi 640,000 vel an endik mek. Bundesliga hi lo khel chhunzawm ta ni se ram chhunga test an neih zawng zawng zinga 0.5% chauh a ni dawn a, tum chuan kawng a awm.

DFL executive committee chuan, "Player endikna hian mipui vantlang tan harsatna a siam dawn a nih chuan a ṭha lo. Chutih rualin tun hnaiah test theihna hmuh a pung zel a, kan ruahmanna a hlawhtlin theih nan kawng pawh a inhawn zel kan beisei," tiin inkhel turin beiseina an nei sang hle.

European football a chawlh ṭhup a, hri leng hi mihring leh mihing inkaichhawn awlsam tak a ni a, player awmkhawm a him loh avangin club tam zawk chuan training pawh an nei rih lo – in hlat taka awm theih chu duhthusam a ni rih.

April 2 aṭang khan RB Leipzig-in training an nei ṭan leh tawh, champion lai Bayern Munich pawhin April 6 aṭang khan inbuatsaihna hi an lo nei tawh bawk; Borussia Dortmund pawhin tun thlatir aṭang khan an player-te chu insawizawi turin thurawn an pe tawh bawk. 

DFL chuan club tin hi training an nei dawn a nih pawhin an dan zawn tur chi hrang 31 zet a siamsak. Chung zingah chuan training an neih laiin an in awm hnaihchilh tur a ni lo a, locker room-ah pawh insik loh tur - a huhoa chawi ei ṭhin pawh khap rih a ni.

Club pakhata player-te hi group hran hranah ṭhenhran an ni a, inhlat taka awmin training hi an kalpui. Inhlat deuh taka awmin ball an inpe kual a, ball chhuih leh in pass chu an thil zir langsar ber a ni.